"Экспертнае асяроддзе". Аналітыка пра Беларусь: праўда і выдумка

11 Снежня 2019
Хто і чаму спрабуе хайпануць у аналітыцы? Гэту тэму сёння абмяркоўвалі падчас чарговага пасяджэння ўдзельнікаў праекта "Экспертнае асяроддзе". На думку аналітыкаў, хайп у медыяпрасторы часам звязаны з элементарнай магчымасцю асобна ўзятага чалавека ствараць інфармацыйныя падставы, седзячы дома на канапе. Акрамя гэтага, удзельнікі круглага стала абмеркавалі галоўныя меседжы замежных "фабрык думкі" і прааналізавалі суадносіны аналітыкі і прапаганды ў дакладах, якія не раз рабіліся па нашай краіне. У асаблівым фокусе экспертаў і інфармацыйнае поле Беларусі, дзе адчуваецца жорсткая барацьба заходніх і расійскіх сіл. 

Валянцін Старычонак, аналітык Беларускага інстытута стратэгічных даследаванняў:  "Захад у дачыненні да нас змяняе сваю танальнасць. Пазіцыя Захаду становіцца больш збалансаванай, больш цікавай. З'яўляецца шэраг прапаноў, напрыклад, з боку ЗША пастаўляць паліва на Беларускую АЭС, што можа сімвалізаваць нейкі крок насустрач у адносінах паміж Беларуссю і Захадам".

Юрый Шаўцоў, палітолаг: "Сёння такой раскошы, як глядзець на Беларусь вачамі людзей, якія відавочна памыляюцца, сёння такой раскошы, мабыць, сусветная экспертная супольнасць на Захадзе дазволіць сабе не можа. Адсюль такая ўвага да Беларусі. Ім трэба рэальна наладзіць адносіны да рэальна наяўнай краіны і народа".

"Экспертнае асяроддзе" - праект БІСД і БелТА


У фармаце круглых сталоў удзельнікі праекта "Экспертнае асяроддзе" збіраюцца рэгулярна і абмяркоўваюць самыя актуальныя і вострыя навіны, пра якія гаворыць уся краіна. Дарэчы, дыскусія даступная для ўсіх  на сайце БелТА ў рубрыцы "Экспертнае асяроддзе".