Грамадзянін Расіі спрабаваў правезці праз беларускую мяжу з Літвы больш за 4 кілаграмы бурштыну. Незадэклараваны каштоўны камень, схаваны пад ашалёўкай багажніка, знайшлі беларускія мытнікі ў пункце пропуску "Каменны Лог".
Паводле інфармацыі ведамства, для мытнага кантролю вадзіцель "хёндэ" выбраў "чырвоны" калідор і ўказаў у дэкларацыі толькі аб перавозе грошай. Аднак падчас агляду былі знойдзены 2 трубкі і 5 скруткаў з жоўтымі камянямі. Як паказалі вынікі экспертызы, гэта бурштын прыроднага паходжання, а таксама вырабы з яго на суму каля 26 тысяч рублёў.
Парушальніку пагражае буйны штраф з магчымай канфіскацыяй схаваных тавараў і аўтамабіля.