Boeing 737, расфарбаваны ў фірменныя колеры самай папулярнай у СНД камп'ютарнай гульні, прызямліўся сёння ў Нацыянальным аэрапорце.
Зараз на паветраным судне ёсць васілёк і беларускі арнамент. Кампанія пафарбавала борт у незвычайнае для пасажырскіх лайнераў спалучэнне колераў - чорны і аранжавы. На гэта спатрэбіліся 300 літраў фарбы і 450 квадратных метраў трафарэтаў. Над ператварэннем самалёта працавалі 13 спецыялістаў. Афарбоўвалі лайнер у Чэхіі. Падзея выклікала вялікую цікавасць у журналістаў. Першымі ўбачыць самалёт сабраліся таксама прыхільнікі гульні з Беларусі і Расіі. Два айчынныя брэнды аб'ядналі намаганні ў папулярызацыі іміджу нашай краіны на сусветнай арэне.
Дарэчы, ужо ў жніўні авіякампанія зменіць знешні выгляд сваіх лайнераў, работа над рэбрэндынгам практычна завершаная. Зараз спецыялісты Белавія знаходзяцца ў ЗША, і ў наступным месяцы беларусам прадэманструюць першы самалёт у новай ліўрэі. Другі Boeing 737-800 па плане прызямліцца ў Мінску ўжо ў верасні, трэці - у лістападзе. Пры гэтым зменіцца не толькі расфарбоўка самалётаў, але і форма супрацоўнікаў. Асобная ўвага - харчаванню на борце.
