Беларусь развітваецца з Анатолем Капскім. Лепшы футбольны менеджар краіны, дзяржаўны дзеяч пасля працяглай хваробы пайшоў з жыцця ў суботу. Яму было 52 гады. У гэтыя хвіліны ў Барысаве працягваецца жалобная паніхіда. Ва ўсіх ёсць магчымасць сказаць дзякуй і бывай Анатолю Капскаму.
У Барысаве зараз працуе наша здымачная група - на сувязі Мікалай Стула.
"Барысаў-Арэна" смуткуе і развітваецца з Анатолем Капскім. На дзве гадзіны труна з целам старшыні праўлення футбольнага клуба БАТЭ выстаўлена ў падтрыбунным памяшканні, куды прыйсці і развітацца можа кожны. І трэба сказаць, нягледзячы на пачатак рабочага тыдня, нягледзячы на дрэннае надвор'е, да "Барысаў-Арэны" з'язджаецца вялізная колькасць машын, людзі ідуць ад прыпынку грамадскага транспарту, бо арэна знаходзіцца на ўскраіне Барысава. Пэўна, кожны з гэтых людзей мае сваю гісторыю зносін з Анатолем Анатольевічам.
Лепшы футбольны менеджар краіны, буйны дзяржаўны дзеяч, ён умеў выклікаць прыхільнасць да сябе. І вельмі цяжка прывыкаць гаварыць аб Анатолю Анатольевічу ў мінулым часе.
Ля труны шмат кветак і вянкоў. Да гэтай хвіліны на паніхіду развітання з Анатолем Капскім прыйшлі прадстаўнікі беларускай Федэрацыі футбола, розных клубаў.
Зараз вельмі шмат гаворыцца пра тое, што Анатоль Капскі пайшоў непераможаным. І гэта сапраўды так. У 1996 годзе ён быў адным са стваральнікаў БАТЭ, у 1999 барысаўчане ўпершыню заваявалі залатыя медалі чэмпіянату Беларусі. З тых часоў каманда стала ўваходзіць у спіс лепшых клубаў краіны. На яе рахунку - чатырнаццаць чэмпіёнскіх тытулаў. Пяць разоў БАТЭ гуляў у Лізе чэмпіёнаў і зацвердзіўся ў статусе гегемона нашага футбола. Нават зараз БАТЭ ўпэўнена ідзе да чарговага чэмпіёнскага тытула, выйграў і апошні матч Лігі Еўропы ў Венгрыі, які Анатоль Капскі, напэўна, глядзеў.
Жалобныя мерапрыемствы сёння пачаліся раніцай у храме святога Арханёла Міхаіла ў аграгарадку Зембін Барысаўскага раёна. Там прайшлі памінальная божая літургія і адпяванне. Развітацца з Анатолем Капскім на "Барысаў-Арэне" будзе магчымасць да 13 гадзін.
