З такой ініцыятывай выступаюць у МУС. Шкала ад 1 да 4 балаў павінна дысцыплінаваць вадзіцеляў, у першую чаргу гэта адчуюць тыя, хто прывык часта ігнараваць правілы. Чым вышэйшы цяжар парушэння, тым больш штрафных балаў, сума якіх прывядзе да пазбаўлення правоў.
Аб чым яшчэ гаварылі ў Палаце прадстаўнікоў Нацыянальнага сходу - даведаемся ва Уладзіміра Каралёва. Сёння парламентарыі разглядаюць прапановы МУС, якія ў будучыні, магчыма, будуць уключаны ў новую рэдакцыю закона "Аб дарожным руху".
Першае, аб чым заяўляюць прадстаўнікі МУС, - аб бяспецы. Па ўзроўні смяротнасці на дарогах Беларусь - сярэднестатыстычная еўрапейская краіна. Узровень гібелі падчас ДТЗ як у Італіі і Бельгіі, лепшы, чым у Польшчы, Расіі і Украіне. За 12 гадоў колькасць смярцей на дарогах знізілася амаль у 3 разы. І гэта прытым, што аўтамабіляў стала на парадак больш. Толькі ў Мінску іх 700 тысяч. У ведамстве пераконваюць, павысіць бяспеку дапаможа бальная сістэма штрафаў для вадзіцеляў. Заядлых парушальнікаў у краіне не так шмат. А вось звычайных вадзіцеляў гэта толькі дысцыплінуе.
Аляксандр Цягельнік, намеснік начальніка УДАІ МАБ МУС Беларусі: "Мы вывучалі замежны вопыт і ўпэўненыя ў тым, што бальная сістэма акажа станоўчы эфект на бяспеку дарожнага руху. Гэта прымусіць задумацца тых вадзіцеляў, якія парушаюць ПДР, што не прыводзяць да пазбаўлення правоў. Нават за самыя малаважныя парушэнні будуць налічвацца балы: 1-4. Гэта дысцыплінуе, будзе спрыяць бяспецы дарожнага руху".
Нельга ўкараняць усе сусветныя новаўвядзенні на дарогі краіны, не ўлічваючы асаблівасць менталітэту, нацыянальнае заканадаўства і адаптацыю да нашых дарог, пераконваюць спецыялісты. З кожным годам дарожная абстаноўка ўскладняецца. І бяспека павінна быць гарантаваная не толькі штрафамі, але і арганізацыяй дарожнага руху.
70 % аварыйнасці на дарогах залежыць ад арганізацыі дарожнага руху. Менавіта таму ў МУС прапануюць надзяліць вялікімі паўнамоцтвамі тыя структуры, якія займаюцца арганізацыяй руху. Перш спраектаваць бяспечную дарогу разумнай разметкай, а толькі пасля ўкараняць яе ў жыццё і абавязкова весці маніторынг аварыйнасці сітуацыі. Ёсць рэкамендацыя і для аўташкол - здача іспытаў на аўтамабілях толькі на аўтаматычнай каробцы перадач.
І сёння ў Беларусі ўводзіцца адказнасць за рух на матацыкле або мапедзе на адным коле або не трымаючыся за руль. За такія трукі байкеру пагражае штраф да 235 рублёў з пазбаўленнем права кіравання да паўгода. А пры стварэнні аварыйнага становішча адказнасць узрастае - штраф да 470 рублёў і пазбаўленне правоў да двух гадоў.
Як адзначаюць спецыялісты, гэтыя новаўвядзенні накіраваны ў першую чаргу на прафілактыку ДТЗ, а як вынік - павышэнне бяспекі дарожнага руху.
