Указам Кіраўніка дзяржавы зацверджаныя катэгорыі асоб, якія могуць разлічваць на гэтыя кватэры. Акрамя таго, паводле праграмы па будаўніцтве жылля на наступны год, у нашай краіне плануюць узвесці пяць мільёнаў квадратных метраў, з іх палову з дзяржпадтрымкай. І вядома, асноўнае месца тут аддаецца арэнднаму жыллю. Падрабязней пра сітуацыю на рынку раскажа Вераніка Рымашэўская.
Кацярына ўвесь час сачыла за абнаўленнямі на сайтах раённых адміністрацый Мінска - там ёсць уся інфармацыя пра вольныя арэндныя кватэры. Трэба проста своечасова напісаць заяву. За паўгода сям'я Цярпіцкіх адчула відавочную выгаду такога жылля.
Кацярына Цярпіцкая, жыхар арэнднай кватэры: У нас плошча кватэры 66 квадратных метраў - гэта паўнавартасная двушка, за такую кватэру мы б аддавалі долараў 400-450, калі б здымалі. У мяне муж інжынер-канструктар, я ў дэкрэце, аддавалі б усю зарплату, пэўна.
А зараз плацяць усяго 1450000. Зрэшты, кошт арэнды залежыць ад месцазнаходжання дома. Кіраўніцтва Заводскага раёна распавяло нам пра цэны ў гэтай частцы сталіцы. Так, двухпакаёвая кватэра каля метро будзе каштаваць 2100000 рублёў. А, напрыклад, найменшая цана - каля мільёна.
Дзмітрый Гурыненка, намглавы адміністрацыі Заводскага раёна г. Мінска: У сярэднім на адну арэндную кватэру каля 15-20 заявак у нашай адміністрацыі, у Фрунзенскім раёне выстаўлялі 30 кватэр - было пададзена 3500 заяў.
Напярэдадні быў падпісаны ўказ, у якім зацверджаныя катэгорыі грамадзян, якія маюць першачарговае права атрымання арэнднага жылля на перыяд працоўных адносін.
Гэта суддзі, пракурорскія працаўнікі, а таксама дзяржслужачыя паводле пераліку пасад, вызначанага Прэзідэнтам Беларусі. Прыватызаваць арэнднае жыллё або пражываць у ім пасля звальнення недапушчальна.
Больш за палову кватэр размяркоўваюць паміж грамадзянамі, якія стаяць на ўліку тых, хто мае патрэбу ў паляпшэнні жыллёвых умоў. Але ў такой чарзе ў Мінску каля двухсот трыццаці пяці тысяч чалавек.
І тут попыт у разы перавышае прапанову. А разам з папулярнасцю расце і патрэбнасць у арэндных дамах. Таму, нягледзячы на тое што ў 2015 у Мінску будаўніцтва жылля скароцяць на 10%, арэндных кватэр пабудуюць удвая больш, чым сёлета.
Арэндны фонд краіны перавышае 26000 кватэр. У новабудоўлях - каля 3500. Калі гаварыць пра сталіцу, дык тут пабудавалі больш як 700 арэндных кватэр, яшчэ амаль паўтары тысячы ў стадыі будаўніцтва. Акрамя таго, нарошчваць аб'ёмы ва ўрадзе плануюць за кошт прадпрыемстваў.
Аляксандр Горваль, начальнік упраўлення Міністэрства архітэктуры і будаўніцтва Беларусі: Пастаўленая задача, каб прыцягнуць рэсурсы арганізацый, прадпрыемстваў на аказанне дапамогі сваім працаўнікам для паляпшэння жыллёвых умоў, і рабіцца гэта будзе ў форме будаўніцтва арэнднага жылля.
Дарэчы, дагаворы на арэнду для агульнай катэгорыі грамадзян складаюць на 5 гадоў, але калі да жыхароў няма ніякіх прэтэнзій, карыстанне кватэрай можа стаць бестэрміновым.
