Аляксандр Лукашэнка аб каранавірусе: Трэба змагацца за кожнага чалавека

7 Красавіка 2020
Акрамя сітуацыі на нафтавым рынку, не менш востра стаіць сёння пытанне з пандэміяй. За некалькі месяцаў з лакальнай успышкі каранавірус ператварыўся ў праблему нумар адзін для ўсёй планеты. Аднак у Беларусі пакуль удаецца стрымліваць лавінападобны рост захворвання.

Аб гатоўнасці нашай сістэмы аховы здароўя процідзейнічаць пагрозам распаўсюджвання інфекцыі таксама гаварылі сёння ў Палацы Незалежнасці ў пашыраным складзе. Акрамя таго, што кожную раніцу Прэзідэнту рыхтуюць падрабязны даклад наконт сітуацыі ў краіне, сёння да абмеркавання далучыліся ўрад, губернатары, начальнікі абласных аддзелаў аховы здароўя і галоўныя ўрачы клінік.

Сітуацыя з каранавірусам пад кантролем медыкаў

Сітуацыя пад кантролем, беларускія медыкі з ёй спраўляюцца. Выбраная  тактыка сябе цалкам апраўдвае. За суткі новых выпадкаў смерці ад каранавіруснай інфекцыі не зарэгістравана. 

Прэзідэнт заклікае сур'ёзна паставіцца да здароўя ўрачоў

Калі за прафілактыку адказныя самі людзі, то арганізацыя засцерагальных мер і лячэнне - безумоўны клопат дзяржавы. У гэтай сувязі Прэзідэнта цікавілі забяспечанасць медустаноў сродкамі індывідуальнай засцярогі. Нагадаем, раней Аляксандр Лукашэнка ўжо даваў даручэнні па вытворчасці ахоўных касцюмаў і рэспіратараў у нас. Робяць усё для таго, каб максімальна стрымаць распаўсюджванне захворвання і аказаць якасную меддапамогу беларусам. 

КДК пракантралюе цэны на некаторую гародніну і садавіну

Да панядзелка даручана зняць усе праблемы з недахопам масак у беларускіх аптэках. Гэтае пытанне на асаблівым кантролі ў Прэзідэнта. Асобна спыніўся Кіраўнік дзяржавы на недапушчальнасці завышэння цэнаў на медпрэпараты, а таксама на некаторую гародніну і садавіну (напрыклад, цытрусавыя і імбір). Да ўрэгулявання сітуацыі падключаць Камітэт дзяржкантролю. А вось увядзенне каменданцкай гадзіны толькі пагоршыць сітуацыю і падарве эканоміку. Адзін з варыянтаў, які абмяркоўваўся на нарадзе, - узмацненне кантролю за тымі, хто знаходзіцца на самаізаляцыі па рэкамендацыі ўрачоў.