Дзіцячае "Еўрабачанне" сабрала ля экранаў меламанаў усяго свету. Пераможніцай стала расіянка - 14-гадовая Паліна Багусевіч. Аднак галасаванне не абышлося без скандалаў. Гледачы рабілі свой выбар на афіцыйным сайце конкурсу, які ў самы важны момант проста адключыўся, і многія прагаласаваць так і не змаглі. Беларуска Хелена Мерааі аказалася на пятай пазіцыі. Рэпартаж нашага спецыяльнага карэспандэнта ў Тбілісі Іны Пілевіч.
Замест флагштока рыбацкая вуда. На такія хітрыкі пайшлі беларускія фанаты дзіцячага "Еўрабачання", каб наша каманда падтрымкі была прыкметная нават сярод соцень гледачоў у зале. Пахварэць за Хелену Мерааі ў Тбілісі з Мінска прыляцелі больш як тры дзясяткі чалавек. Сябры, родныя, педагогі, прыхільнікі праводзілі канкурсантку на сцэну.
Перад трансляцыяй салодкі падарунак. Гіганцкі торт з сімволікай 15-га дзіцячага "Еўрабачання" разабралі па кавалачках каманды 16 краін-удзельніц.
У дзень фіналу здымкі ў глядзельнай зале забаронены. А на арэне не дапускаецца выкарыстанне радыёмікрафона. Журналістам прыходзіцца працаваць з такім провадам, каб не нашкодзіць якасці гуку падчас трансляцыі. Хаця ў сітуацыі тэхнічных непаладак у каманды Еўрапейскага Вяшчальнага Саюза ёсць план Б. У выпадку форс-мажораў у эфір запускаюцца нумары, знятыя напярэдадні на генеральным прагоне.
У міжнародным эфіры Беларусь прагучала пад пятым нумарам. Хелена Мерааі выканала кампазіцыю "Я самая" на подыуме з люстэркамі, якія круціліся. Яны адлюстроўвалі светлавыя промні і стваралі містычную атмасферу на сцэне. А ружовыя рукавы касцюма зліваліся ў адзінае цэлае з графічным афармленнем выступлення.
Упершыню ў гісторыі конкурсу публіка выказвала свае перавагі не з дапамогай званкоў і СМС, а праз Інтэрнэт. Не абышлося і без тэхнічных непаладак. Падчас галасавання адбыўся збой на сайце дзіцячага "Еўрабачання", і многія гледачы не змаглі падтрымаць упадабаную кампазіцыю.
Улічвалася меркаванне і экспертаў. Так, журы Мальты паставіла Хелене Мерааі максімальны бал. У выніку падсумоўвання адзнак суддзяў і гледачоў шкляны еўравізійны мікрафон дастаўся Паліне Багусевіч з Расіі.
Наша прадстаўніца на пятай пазіцыі. Але незалежна ад вынікаў Хелена гаспадыня наступнага дзіцячага "Еўрабачання". Праз год юная выканаўца будзе прымаць гасцей міжнароднага песеннага конкурсу ў Мінску.
