Сёння адзначаецца Дзень беларускага пісьменства. Прэзідэнт Аляксандр Лукашэнка накіраваў віншаванне ўдзельнікам і гасцям урачыстасцяў.
"У Год культуры яго правядзенне набывае асаблівае значэнне. Увага грамадства засяроджаная на неабходнасці беражлівага захавання лепшага духоўнага набытку, што дайшоў да нас скрозь стагоддзі, і ўзбагачэння нацыянальнай скарбніцы дасягненнямі нашых таленавітых сучаснікаў, паколькі гістарычная памяць і гонар за Радзіму служаць трывалым падмуркам для далейшага развіцця краіны", - гаворыцца ў віншаванні.
Акцэнт культурнага жыцця Беларусі сёння перамясціўся ў старажытны Рагачоў. Горад у Гомельскай вобласці, які адлічвае сваё дзявятае стагоддзе, прымае эстафету сталіц свята беларускага пісьменства. На тры дні раённы цэнтр сабраў творчую эліту ўсёй краіны.