Менш за гадзіну засталося да “Нараджэння зорак” на сцэне музычнага тэатра. Расійскі рэжысёр Ілья Усцьянцаў сабраў у рэвю нашумелыя ўрыўкі сусветных мюзіклаў.
Для прыхільнікаў "Ганны Карэнінай" - экспазіцыя ў Музеі гісторыі беларускай літаратуры. Пераказ зместу самага чытальнага рамана Льва Талстога - у прыжыццёвых выданнях, рукапісах і копіях.
Прэм'ернае мастацтва, міма якога не прайсці, у рубрыцы "Праменад".
Расказвае Лідзія Заблоцкая.
"Каханне жыве тры гады", а пасля перараджаецца ў містычны дэтэктыў. Даказана тэатрам Горкага. Больш за тысячу дзён тут разбіралі псіхалогію "Братоў Карамазавых». Цяпер жа апошняя кніга Дастаеўскага - першая прэм'ера на гэтай сцэне пасля рэканструкцыі.
Мінімум дэкарацый, максімум святла. Спектакль літаральна "драматызуюць" прамянямі і расстаўляюць акцэнты для гледача. Прачытанне фатальнай гісторыі адной рускай сям'і прывабна канцэптуальна. Такі рэфармат класікі ад народнай Вольгі Клебановіч. Праца над выявамі - у руках мастацкага кіраўніка Кавальчыка.
Дарэчы, прэм'ера менш чым праз гадзіну. Чакаюць тэатралаў ад 14 гадоў. Да канца года перажыць драму аб "ілжывых ісцінах" можна яшчэ тройчы.
Эталонныя прэм'еры даюць і сцены Нацыянальнага мастацкага. Разархівавалі графічнае "золата". Творы беларускіх 20-х гадоў XX стагоддзя штрыхамі Аркадзя Астаповіча.
Ён нарадзіўся ў Мінску на стыку стагоддзяў, але за 45 гадоў паспеў пакінуць сотні актуальных знакаў тушшу. Атрымліваў мастацкую адукацыю ў Санкт-Пецярбургу, Харкаве, але ўсё роўна вярнуўся настаўнікам у родныя Навасёлкі, што пад сталіцай. Урбаністычныя дражджавы завод, калгас «Авангард», праца брыгад і партрэт маці. Пралетарскі рэалізм мірыў з абстракцыяй. Рэдкі мастак, даваенная творчасць якога захавалася ў такім буйным маштабе. Толькі ў мастацкім дзве сотні работ.
І цікавы інтэрактыў ад галоўнай галерэі. Калі будзеце тут, параўнайце малюнкі маладых мастакоў з палотнамі ад прызнаных жывапісцаў. Літаральна "погляд знізу" на карціны ад вучняў творчай студыі "У госці да Цюбіка".
Восень заканчваецца толькі на календары, у эстэтаў самы яе разгар. У Белдзяржфілармоніі палае класіка. Традыцыйная 47-я "Музычная восень" усё ж адбудзецца. У гасцях - расійскія музыканты.
Напрыклад, 23 лістапада ў вялікую залу філармоніі пусцяць дух сабораў Парыжа. За арганам выканаўца з Пецярбурга Ягор Колесаў. У афішы ўсяго 15 зусім не падобных адзін да аднаго канцэртаў. Джаз у выкананні баяна, эстрадны мікс ад ансамбля "Свята", адразу тры хары на сцэне разам з сімфанічным аркестрам у гонар 100-годдзя маэстра Роўды і полімедыйныя містэрыі ад камернага аркестра.
З сённяшняга дня могуць шамацець квіткамі і тыя, хто штогод атрымлівае асалоду ад кінафоруму "Лістапад". Адкрываецца продаж на паказы. Дарэчы, да фестывалю фактычна тыдзень. Больш падрабязна пра тое, што пакажуць на экранах Мінска, на сайце форуму. А на tvr.by яшчэ больш ідэй для арт-выхадных.
