Дарогі, якія выпрацоўваюць электраэнергію, і расліны, якія выкарыстоўваюць замест батарэек. Юныя вынаходнікі Гомельскай вобласці сёлета на конкурсе "100 ідэй для Беларусі" прапанавалі рэкордную колькасць праектаў па зялёнай энергетыцы. Прычым, кожную з распрацовак можна рэалізаваць на практыцы і атрымаць добры энергазберагальны эфект.
З аўтарамі праектаў сустрэлася Ганна Кавалёва. Некалькі месяцаў на стварэнне схем, паўгода на ўвасабленне макета. Так, сямейным падрадам два інжынеры-пачаткоўцы стварылі ляжачага паліцэйскага, які выпрацоўвае ток. Сакрэт у нагрузцы: сваёй вагой аўтамабіль ўздзейнічае на дарожнае палатно. Вынік - выпрацоўка электрычнасці, якая можа забяспечваць энергіяй цэлы квартал. Каб пераканацца ў поспеху справы, Міхаіл Унукаў прааналізаваў транспартны паток на адной з вуліц Гомеля. Выніковыя разлікі сталі рэальным пацвярджэннем перспектыўнасці праекта.
Свой праект Міхаіл прапанаваў на форуме Беларусі і Расіі і першым беларуска-ўкраінскім форуме. У абодвух выпадках ідэя зацікавіла бізнесменаў, навукоўцаў і прадстаўнікоў улады, якія на вуліцах сваіх гарадоў хацелі б бачыць такія ж тэхналогіі.
І калі Міхаіл прыйшоў да свайго адкрыцця, будучы ўжо студэнтам, Варвара Краўцова ролю вучонага прымерыла яшчэ школьніцай. Старшакласніца атрымлівае электраэнергію з раслін. Методыка даўно і ў прамысловых маштабах прымяняецца ў Галандыі. Аб замежнай распрацоўцы даведалася настаўнік біялогіі Марына Капцэвіч. Яе вучаніца, без пяці хвілін выпускніца і прэтэндэнтка на залаты медаль Варвара Краўцова, думку падхапіла і вырашыла ўвасобіць. Да энтузіястаў далучыліся 10-класніца Юлія Какадзей і настаўнік фізікі Вера Ліванская. Вынікам стаў беларускі варыянт, у якім электрычнасць выпрацоўваецца дзякуючы сімбіёзу раслін, зямлі і акісляльных працэсаў.
Міхаіл і Варвара ў конкурсе "100 ідэй для Беларусі" свае вынаходкі прапанавалі ўпершыню і адразу прабіліся ў фінал. З імі - яшчэ 11 праектаў з Гомельскай вобласці. Сярод ідэй: электронны флікер, ІТ-дыягностыка захворванняў і аўтаномныя электрастанцыі для фермерскіх гаспадарак. Ідэі рэальныя і могуць быць ужытыя ў энергетыцы, медыцыне, на транспарце і ў гарадской інфраструктуры.
Дарэчы, фінал конкурсу "100 ідэй для Беларусі" адбудзецца ў Мінску ўжо праз некалькі тыдняў. І паводле традыцыі для ўдзельнікаў ён стане магчымасцю не толькі атрымаць перамогу, але і ўвасобіць свае ідэі ў жыццё.
