Яшчэ 10 дзён таму гэта было самае звычайнае бервяно, а зараз сапраўдны твор мастацтва. Праца яшчэ ідзе, але сюды як на экскурсію прыходзяць і дарослыя, і дзеці. Майстры не пярэчаць - незалежныя эксперты ацэньваюць мастацкі ўзровень і тэхніку разьбы.
Народны майстар Беларусі Валерый Мінкоў на пытанне, колькі гадоў ён займаецца драўлянай скульптурай, не задумваючыся адказвае - усё жыццё. Але апошнія 35 гадоў менавіта на прафесійным узроўні. Персанажаў вядомай народнай казкі спачатку ўвасобілі з сынам у эскізе - зараз дапрацоўваюць апошнія штрыхі ў дрэве.
Бензапіла, сякера, стамескі - абмежаванняў па інструментах няма. Разьбяры з усяго рэгіёна павінны вырабіць дзве скульптуры - адну вышынёй да паўтара метра, другую - да аднаго.
Курачка Раба, вожык, дамавік, пугач. Гэтым разам ва ўдзельнікаў фэсту - казачная тэматыка. Для натхнення - уласная фантазія, дубы і возера, на беразе якога праходзіць пленэр.
Вынікі конкурсу "Ажыўшая даўніна" ўбачаць не толькі эксперты мастацкай камісіі і самі майстры. Частка скульптур пасля завяршэння фэсту застанецца ўпрыгожваць вуліцы Добруша. Астатнія адправяцца ў Гомель.