Сучаснае абсталяванне было набыта год таму за кошт сродкаў абласнога бюджэту. Гэта дазваляе праводзіць нават самыя складаныя аперацыі на вачах, аб чым яшчэ год таму гамяльчане маглі толькі марыць. Разам з пацыентамі якасць аперацый правяраў наш карэспандэнт Яўген Пабалавец.
Дар’я Курашава на аперацыю прыехала з Рэчыцы. Апошнім часам стала дрэнна бачыць, таму і вырашыла зрабіць карэкцыю зроку. У Дар’і рэфракцыя вачэй мінус 3, але тут робяць аперацыі пацыентам з рэфракцыяй і да мінус 15, якія без ачкоў нічога не бачаць, нават верхні радок табліцы.
Абсталяванне коштам больш за 800 тысяч долараў набылі за сродкі абласнога бюджэту. Гэты сучасны апарат з'явіўся ў абласным афтальмалагічным цэнтры год таму. З таго часу прааперыравалі каля тысячы пацыентаў.
Гэта самы хуткі ў свеце эксімерны лазер. Яго тэхнічныя характарыстыкі напрамую ўплываюць на вынік і дазваляюць скараціць час аперацыі. Карэкцыя на двух вачах займае ў сярэднім 15 хвілін.
Аперацыя высокатэхналагічная, выконваецца з лазернай дакладнасцю. Ад правільнасці настроек залежыць, ці атрымае чалавек запланаваную адзінку. Абсталяванне тэстуюць раніцай, а потым перад кожным пацыентам. Робяць тут і складаныя аперацыі, якія раней праводзіліся толькі ў Мінску ці за межамі краіны.
Уладзімір Катовіч, галоўны абласны афтальмолаг, загадчык 1 афтальмалагічнага аддзялення Гомельскай абласной спецыялізаванай клінічнай бальніцы:
"Чалавек хоча атрымаць ідэальны зрок пры вельмі дрэннай паталогіі. Зараз мы камбінуем замену крышталіка з наступным этапам - шліфоўкай рагавіцы лазерам - і атрымліваем практычна ідэальную оптыку вока. Яшчэ летась гэта было нерэальна і немагчыма для нашай вобласці".
Тут лечаць і бытавыя траўмы вачэй, пранікальныя раненні, дэфармацыю рагавіцы і скажэнне оптыкі. Ёсць толькі адно абмежаванне. Гэта ўзрост – ад 20 да 40 гадоў. Поўнае аднаўленне зроку займае ад аднаго дня да паўгода. Усё залежыць ад узросту і індывідуальных асаблівасцяў. У пацыентах недахопу няма, ёсць нават невялікая чарга на карэкцыю. Дарэчы, кошт такой аперацыі ў Гомелі ў некалькі разоў ніжэйшы за аналагічныя паслугі за мяжой.
