Знакавы інвестыцыйны і інфраструктурны праект на тыдні трапіў у навінавыя зводкі. З Кітая прыбыў першы грузавы цягнік з правінцыі Хэбэй. У 40-ка кантэйнерах - будаўнічыя матэрыялы для індустрыяльнага парка "Вялікі камень"
За 16 дзён састаў пераадолеў 9 з паловай тысяч кіламетраў - гэта новы кітайскі транспартны калідор у Еўропу, частка "Эканамічнага пояса Шаўковага шляху". Тут ужо і нашы лагістычныя планы. Для поспеху праекта неабходна, каб тавары пастаўляліся не толькі з Кітая ў Беларусь, але і з Беларусі ў Кітай. Час дастаўкі грузу па чыгунцы ў некалькі разоў меншы, чым морам.
Ху Чжэн, генпрадстаўнік прадстаўніцтва "Чайна Мерчантс груп" у раёнах Цэнтральнай Азіі і Балтыі: "Гэта вельмі вялікая падзея. Цягнік ехаў 16 дзён праз Кітай, Казахстан, Расію і Беларусь. Гэта трансгранічная дастаўка на вялікія адлегласці. Калі па моры, то запатрабавалася б мінімум 25 сутак. Скарачэнне часу дастаўкі забяспечыць эфектыўнасць будаўніцтва. Упэўнены, што па меры развіцця парка ўсё больш грузаў будуць дастаўляць менавіта чыгункай".
