Рабочы графік Прэзідэнта на гэтым тыдні быў насычаны міжнароднымі сустрэчамі з самай шырокай геаграфіяй. У Мінску з візітамі пабывалі прадстаўнікі адразу некалькіх еўрапейскіх краін. Прайшлі перамовы з партнёрамі па еўразійскай інтэграцыі.
На першы план так або інакш выходзіць эканоміка. Наш аглядальнік Наталля Брэвус - пра ключавыя моманты гэтых сустрэч.
Мінулы тыдзень у Беларусі стаў навочнай ілюстрацыяй стратэгіі шматвектарнасці. Ні дня без замежнага госця! Прычым візіцёры і з Захаду, і з Усходу. Гэта тая самая палітыка, якая вызначае будучую эканоміку.
На сустрэчы з міністрам замежных спраў Польшчы Аляксандр Лукашэнка адразу дае зразумець: выбіраць паміж Захадам і Усходам Беларусь не будзе. Дыялог з усімі. На аднаўленне размовы паміж краінамі, падобна, узяў курс і новы польскі ўрад. Дзяржавы сапраўды шматлікае злучае. Нават у самога міністра, які ўстаў у руля польскай дыпламатыі ў лістападзе, - беларускія карані. Мама родам з Ваўкавыска. Але гаварылі не толькі пра агульную гісторыю. Вялікі патэнцыял бачаць у сумесных інфраструктурных праектах. Усё ж краіны транзітныя. Абмяркоўваўся міжнародны парадак дня, пытанні бяспекі ў рэгіёне.
Вітальд Вашчыкоўскі, міністр замежных спраў Польшчы: "Я ўдзячны за арганізацыю гэтай сустрэчы, новы польскі ўрад лічыць ненармальнай сітуацыю, калі суседзі на працягу доўгіх гадоў не размаўляюць. Таму мы вырашылі без усякіх умоў пачаць дыялог і ўрэгуляваць усе суседскія адносіны".
Славенія заняла годную пазіцыю ў дачыненні да Беларусі. Асабліва пры абмеркаванні праблемных пытанняў з Еўрасаюзам. Зрэшты, у нас з рэспублікамі былой Югаславіі заўсёды былі добрыя адносіны. Трэба іх пашыраць.
Падчас размовы са славенскім віцэ-прэм'ерам, які адначасова і асоба дыпламатыі краіны, Прэзідэнт запрасіў бізнесменаў з гэтай дзяржавы актыўней прыходзіць на беларускі рынак.
200 мільёнаў долараў - такую планку ў тавараабароце ставяць для сябе Беларусь і Грузія. Напрыклад, трактарны павялічыць пастаўкі ў гэтую краіну. Спецыяльна для грузінскіх аграрыяў створаць малагабарытны бульбяны камбайн. Яшчэ адзін крок на збліжэнне - сумеснае прадпрыемства па вырабе ліфтаў. Пункты судакранання шукалі і на бізнес-форуме ў Мінску. Нягледзячы на выхад Тбілісі з СНД, у беларуска-грузінскіх адносінах захаваны рэжым свабоднага гандлю. Гэта значыць, для Грузіі Беларусь - магчымасць выйсці на рынак Еўразійскага эканамічнага саюза. Наўзамен - эфект ад асацыяцыі Тбілісі з ЕС.
Першы год існавання вялікага інтэграцыйнага праекта - Еўразійскага эканамічнага саюза - прайшоў пад старшынствам Беларусі. Што зроблена? Але галоўнае, як будуць удасканальваць еўразійскую пяцёрку? Гэтая тэма стала ключавой на сустрэчы з новым старшынёй калегіі аб'яднання. На гэтай пасадзе Віктара Хрысценку змяніў экс-прэм'ер Арменіі Тыгран Саркісян.
Усе магчымасці ў гандлі павінны выкарыстаць Мінск і Арол. Тавараабарот прыпаў - трэба выпраўляць. У Арлоўскую вобласць Беларусь экспартуе нафтапрадукты, тавары АПК, грузавыя аўтамабілі. Гэта буйны прамысловы цэнтр Расіі. Ёсць прастора для кааперацыі. Праграма ў дэлегацыі была насычанай. Абавязковы прыпынак - на БелАЗе. На гэтым прадпрыемстве калісьці працаваў бацька арлоўскага губернатара. За апошнія дзесяцігоддзі рэспубліцы атрымалася наладзіць кантакты практычна з усімі рэгіёнамі Расіі. Толькі за мінулы год Беларусь наведалі дэлегацыі 40 суб'ектаў федэрацыі.
Беларусь лёгка можа стаць месцам для правядзення сусветнага чэмпіянату па цяжкай атлетыцы. Ёсць і вопыт, і неабходная інфраструктура. Такая магчымасць абмяркоўвалася на сустрэчы з Тамашам Аянам. Кіраўнік міжнароднай федэрацыі гэтага віду спорту высока ацаніў поспехі Беларусі.
Тамаш Аян, кіраўнік Міжнароднай федэрацыі цяжкай атлетыкі: "Мы прапаноўваем Беларусі прыняць удзел у конкурсе на правядзенне чэмпіянату свету па цяжкай атлетыцы 2019 года. Думаю, прэтэндаваць на гэтае права будуць яшчэ 4-5 краін. Калі Беларусь прыме ўдзел і выйграе, я ўпэўнены, гэта будзе добрае мерапрыемства. Акрамя таго, я лічу, у вашай краіны ёсць добрыя шанцы атрымаць права на правядзенне юніёрскага і моладзевага чэмпіянатаў свету па цяжкай атлетыцы, якія павінны прайсці ў наступныя гады".
Міжнародная федэрацыя ініцыюе правядзенне ў 2019 годзе чэмпіянату свету сярод мужчын і жанчын. Ён стане кваліфікацыйным турнірам перад летнімі Алімпійскімі гульнямі ў Токіа ў 2020.
