Зімовыя віды спорту ў Беларусі неабходна захаваць. Гэта заявіў Прэзідэнт на вялікай нарадзе па выніках сезона. Няўстойлівы клімат нашых шырот ды і часам адкрыта дрэнныя вынікі спартсменаў наводзяць на думку, што лягчэй адмовіцца ад развіцця немедальных відаў. Але Аляксандр Лукашэнка перакананы: працавітасць разам з новымі тэхналогіямі здольная ўдыхнуць другое жыццё як у лыжныя дысцыпліны, так і канькабежныя.
Прэзідэнт чарговы раз нагадаў, што грошы для годнай аплаты годнага выніку ў краіне знойдуцца, і запатрабаваў распрацаваць у кожным відзе спорту канцэпцыю развіцця на 10-15 гадоў.
Як жа будуць у Беларусі ствараць эфектыўную сістэму выхавання атлетаў, і што мы маем на сёння?
Расказвае Мікалай Стула. У нас няма спорту высокіх дасягненняў. З вуснаў Аляксандра Наваковіча, дырэктара Цэнтра алімпійскай падрыхтоўкі, гэтыя словы аб фігурным катанні гучаць як прысуд. Беларусь не была прадстаўлена на Алімпійскіх гульнях у Пхёнчхане. І не скажаш, што няма з каго выбіраць. Калі зыходзіць з масавасці, то многія віды аб такой могуць толькі марыць.
Толькі ў дзяржустановах фігурным катаннем займаюцца 1066 дзетак, з імі працуе 71 штатны трэнер у 11 аддзяленнях па ўсёй краіне. А калі ўлічыць, што фігурнае катанне - гэта прыгожа, эстэтычна, ёсць дах над галавой, то зразумелы выбар бацькоў. У прыватных школах тых, хто займаецца, не менш. Таму нават сёння пры адсутнасці вынікаў на дарослым узроўні танцамі на лёдзе займаюцца тысячы дзяцей. Але яны не бачаць перспектыў.
Дзеці ў 14 гадоў не бачаць перспектыў і пакідаюць спорт. Больш налягаюць на вучобу. Таксама нядрэнна, але краіна ўкладвае грошы ў вялікі спорт, а не толькі ў масавае катанне на лёдзе. Аляксандр Наваковіч прызнаецца: гэта беларуская памяркоўнасць у горшым яе праяўленні.
Вакол асоб трэнера і спартсмена павінна быць створана цэлая сістэма ў кожным відзе, патрабуе Прэзідэнт. Аляксандр Лукашэнка чарговы раз гаворыць аб вялікай увазе дзяржавы да спорту і падмацоўвае гэтыя словы лічбай - толькі за апошні алімпійскі цыкл (гэта чатыры гады) на зімовыя віды затрачана дзесяць з паловай мільёнаў долараў. Аддача пры гэтым недастатковая: нават золата Пхёнчхана збольшага заваявана выпадкова, і спецыялісты з гэтым згаджаюцца.
Беларусь - невялікая краіна і не можа сабе дазволіць памыляцца на этапе селекцыі, таму новыя тэхналогіі абавязковыя на этапе выяўлення талентаў. Зараз пры Федэрацыі біятлона працуе комплексная навуковая група, якая спрабуе праверыць па паказчыку максімальнага спажывання кіслароду дзяцей нават з самых аддаленых куткоў краіны. Пры гэтым робіцца добрая справа не толькі для біятлона, але і для сумежных лыж.
Вось гэтыя 12 адабраных біятланістаў павінны праявіць сябе хутка. 17-гадовага Аляксандра Кошына і зусім бачаць на Гульнях у Пекіне. Пакуль жа падлеткі ў Музеі Вялікай Айчыннай вайны атрымліваюць і належнае патрыятычнае выхаванне, без якога поспехі ў спорце немагчымыя. Навуковы падыход павінен прысутнічаць у кожным відзе. Часы, калі вызначалі талент і трэніравалі па адчуваннях, беззваротна мінулі.
Жорсткая барацьба з допінгам у сучасным спорце - гэта данасць. Ідэя разумная, праўда, яна ўсё больш набывае палітычную афарбоўку. І паспрабуй разбярыся, дзе атлетаў караюць па заслугах, а дзе проста ўхіляюць па надуманных прычынах? Зараз вось разгараецца грандыёзны скандал у сусветным біятлоне. Свет застыў у чаканні новых выкрыццяў. Радасна, што нашы спартсмены ў гэтых справах даўно не заўважаныя.
Вячаслаў Богуш - майстар спорту па лыжных гонках, трэнер мясцовай ДЮСШ - чалавек у раёне вядомы. Дзевяць гадоў як на пенсіі, але любімую справу не кідае. Ён - асоба, на яго прыкладзе як нельга лепш відаць, што значыць чалавечы фактар. Інвентару не заўсёды хапае, але Богуш не прывык плакацца. Каб неяк выходзіць са становішча, трэнер сваімі рукамі рамантуе дзіравыя лыжныя чаравікі, лыжы і палкі. У падвале абсталяваў майстэрню. Зламаны інвентар Богушу аддаюць і знаёмыя спартсмены. Так у дзетак з'яўляецца магчымасць ацаніць, напрыклад, "Фішэры".
Вячаслава Богуша Прэзідэнт убачыў па тэлевізары і на нарадзе ставіў усім у прыклад. Цяжка не пагадзіцца.
Павышэнне матэрыяльна-тэхнічнай базы не проста размовы, запэўнівае Аляксандр Лукашэнка. Ужо дадзены канкрэтныя даручэнні па выпуску ў Беларусі лыж, чаравік, ратракоў, лёдазалівачных машын і іншага. Лыжаролерныя трасы з'явяцца ў кожнай вобласці ўжо да лета. Чаго нельга стварыць у сябе - трэба купіць. Так, у горных лыжах набылі трэнажор. Заводзіш на панэлі любую трасу свету і праводзіш трэніроўку, імітуючы рухі лыжніка. Ва ўмовах раўніны гэта дапамагае, дазваляе замяніць замежныя зборы.
Мы не павінны страціць зімовыя віды - рэзюмуе Прэзідэнт. Але размова нават не столькі пра спорт высокіх дасягненняў. У школах дзеці абавязаныя бегаць на лыжах і каньках. Такі час - дзеля здароўя нацыі будучыя пакаленні трэба адцягнуць ад гаджэтаў. І гэта сур'ёзны выклік.
