Пачнем праграму з тэмы аўтамабільнай, якая на тыдні ва ўсіх сэнсах нумар адзін. У пятніцу пад Барысавам дарэчы было выклікнуць тое самае знакамітае "Паехалі!". Першы беларускі легкавы аўтамабіль і напраўду жвава сышоў з канвеера, а яшчэ гадоў дзесяць таму думка пра тое, што наш завод выпусціць аўтамабіль еўрапейскага класа і якасці, здавалася нейкім космасам.
Падзея, бясспрэчна, увойдзе ў гісторыю сучаснай Беларусі і айчыннага машынабудавання. Флагманскі красовер, выпушчаны на «БелДжы», ужо ў панядзелак адправіцца на дарогі Еўразійскага эканамічнага саюза.
Праект узвядзення завода з поўным цыклам у сціснутыя тэрміны эксперты ўжо назвалі ўнікальным! Нават на меркі сусветнага аўтапрама. На першым этапе завод будзе выпускаць да 60 000 аўтамабіляў за год, але гэта пакуль. А дзяржава ўжо распрацоўвае меры падтрымкі будучых аўтаўладальнікаў.
Прынцыпова новая для краіны вытворчасць упісалася ў беларускія краявіды. А яшчэ ў стратэгічную для нас ініцыятыву Кітая "Шаўковы шлях". За стварэннем завода стаіць валявое рашэнне лідараў дзвюх краін - Беларусі і Кітайскай Народнай Рэспублікі.
Дарэчы, у перакладзе з кітайскага "джылі" - гэта шчасце і дабрабыт. І калі яго памножыць на беларускі вопыт, працавітасць, дадаць чалавечы патэнцыял, то ў амбіцыйнага аўтамабільнага праекта відавочна шматабяцальная будучыня.
Шматлікія СМІ паспяшаліся зладзіць тэст-драйв новай мадэлі. Думаю, выпрабуем машыну і мы, але крыху пазней і ўжо без прысутнасці тэлекамер. А вам вырашылі распавесці больш пра тое, што стаіць за ўнікальнай для нашай краіны вытворчасцю. Як танчаць нямецкія робаты? Што ўнутры флагманскага красовера? І чаму ў Атланта - міфалагічнага трымальніка неба - зараз у Беларусі адразу два вобразы? Адказы ў вялікім рэпартажы Алесі Высоцкай.
Зграбнае аблічча ад брытанскага дызайнера, з нямецкай якасцю зваркі-афарбоўкі і скандынаўскім кантролем над зборкай. Прамысловы інтэрнацыянал так і хочацца пратэсціраваць. Адчуваеш сябе патрыётам і захавальнікам традыцый - бо зроблена ў Беларусі і ў той жа час чалавекам свету.
Прыгажуны стаяць у шэраг. У белым, чорным, у любімым колеры дызайнера - у серабры. І кожны пад пэўнага пакупніка.
Назва флагмана, які адправіцца заваёўваць дарогі Еўразійскага саюза, - Атлас. Грыф "сакрэтна" не здымаўся да апошняга. Грацыю ў дызайне і імклівасць гепарда ў руху злучылі з сілай грэчаскага бога - трымальніка неба. Беларусам яго другое імя больш звыклае - Атлант. Так што з гэтага часу ў тытана адразу два беларускія вобразы: мінская бытавая тэхніка і зараз барысаўскі красовер.
Брытанскі дызайнер Пітэр Хорберы - ас у сваёй справе. Новую вытанчанасць "Вольва" прылічаюць да яго заслуг. З канвеера барысаўскага завода будзе сыходзіць машына, здольная пераадолець суровую зіму і гарачае лета без страты элегантнасці.
118 гектараў. Завод-гігант. З такой жа глабальнай заяўкай на лідарства. Новая вытворчасць пад Барысавам адказвае патрабаванням сусветнага аўтапрама.
Гэта галоўны тэхнолаг пра тэмпы стварэння. Рэкорд! Нават на сусветныя меркі. Два гады таму тут была пустэча. Сёння - збіраюць машыны.
Поўны цыкл - гэта значыць, машыны збіраюцца ў Беларусі з нуля. Зварка, афарбоўка, зборка - ключавыя цэхі. І на кожным этапе - лепшае, што ёсць у свеце ў тэхналогіях, абсталяванні, інструментах і нават фарбах (з сусветнай якасцю і адаптацыяй пад беларускі клімат).
Свежы звараны кузаў пад пільнай увагай намесніка начальніка цэха. Якой зварка павінна быць у ідэале, Дзмітрый Хоміч вывучыў за мяжой.
У працы Дзмітрый бачыць асаблівую паэзію. Бо ад зваркі залежыць даўгавечнасць аўто.
Вось ён - той самы кузаў! Пакуль у ім складана разглядзець прыгожы красовер, які ўпэўнена займае сусветныя рынкі і зараз ужо з пазнакай "Зроблена ў Беларусі". Лінія на 100 працэнтаў выключае чалавечы фактар. Хоць выпадковых людзей на заводзе няма. За кожным не проста тэорыя інстытутаў, але жыццёвая школа на флагманах машынабудавання. Цэх зваркі Уладзімір Шавель ведае з падмурка.
Чэпкая рука захоплівае дах. Наносіць герметык і віртуозна змяняе інструмент. Усё разам - танец у класіцы жанру. Такія ж робаты на заводах "Паршэ" ў Германіі. Аналагаў у Беларусі няма. Намдырэктара з кітайскага боку на наша пытанне аб якасці адказаў з доляй шкадавання. Нават у Кітаі на "Джылі" ў параўнанні з беларускай лінія састарэла.
Стварэнне нацыянальнага вытворцы ў прэміяльным легкавым сегменце для беларускага лідара было марай. Аляксандр Лукашэнка не раз адзначаў, што аўтамабілі захапляюць яго з дзяцінства. Адгэтуль і патрабаванні жорсткія. А ўвага - пільная да кожнага тэхналагічнага працэсу.
Афарбоўкай на новай вытворчасці занятыя таксама немцы. Дакладней, тыя самыя робаты, што фарбуюць "Джэнерал Мотарс" і ў сусветным маштабе - ад Лацінскай Амерыкі да Еўразіі - размалёўваюць самалёты.
Гэта цэлая навука: дакладны разлік фарбы, траекторыі, часу. Беларускі красовер, сведчаць эксперты, вытрымае не адзін дзясятак суровых зім. Спецыяльна для нашага клімату распрацавалі і ўкаранілі ўзмоцненае васкованне кузава з дыягностыкай да міліметра.
Вопыту па легкавых аўтамабілях у беларусаў яшчэ не было. Тэхналогіі адпрацоўваюцца сусветныя. А школа ўласнага легкавога аўтапрама фарміруецца на нашых вачах.
За ўсю гісторыю Беларусь упершыню настолькі блізкая да гэтага. Бо вырасціла наша зямля вядомых на ўвесь свет канструктараў і стваральнікаў БелАЗаў, аўтацягнікоў, унікальнай ваеннай тэхнікі і функцыянальных машын для АПК, дарог, лясной гаспадаркі.
Выбітныя розумы машынабудавання адукацыю атрымалі ў сценах нашага навукова-тэхнічнага інстытута. Студэнты глядзяць у будучыню і ўжо абмяркоўваюць з'яўленне ў Беларусі выдатнай пляцоўкі для вывучэння перадавых тэхналогій легкавога аўтапрама. Сярод іх і Антон Дземідовіч. Ён пакуль толькі на трэцім курсе, але ўжо марыць стварыць уласны электракар.
Будучыня беларускага легкавога аўтапрама за моладдзю, гавораць навукоўцы. А мара стварыць цалкам свой беларускі аўтамабіль не такая ўжо і завоблачная.
Пакуль жа галоўнае - на аснове сусветных трэндаў і тэхналогій стварыць па-сапраўднаму "народны аўтамабіль".
Прыпынак ля зоны ўсталёўкі хадавой і тармазной сістэм. Для еўразійскага рынку - моманты прынцыповыя. Бо гэта ў Беларусі дарогі добрыя, а за Бранскам, Смаленскам, Чарнігавам або Астаной могуць быць іншыя дарожныя рэаліі. Адгэтуль гэткая падрабязная інспекцыя ад робата на магнітнай падушцы да кантрольнай гайкі на зборцы.
На зборцы працуе шведскі электраінструмент. Можна сказаць, што ўся вытворчасць - гэта ўзаемны кантроль інтэлекту чалавечага і штучнага, гаворыць Дзмітрый Пятровіч. У яго веданні цэх зборкі з магчымасцю цыкла: 4 хвіліны - адзін аўтамабіль.
Завод узводзілі з перспектывай. І адна з найбліжэйшых задач - даць штамповачнаму цэху барысаўскую прапіску. Узровень жа лакалізацыі давядуць да 52%. На першым этапе беларускай вытворчасці ў "Атласе" будуць акумулятар, шкло і дыскі, сядзенні, рухавік, заднія ліхтары, выхлапная і тармазная сістэмы. Гэта дазволіць загрузіць заказамі дзясяткі сумежнікаў, гарантуе працоўныя месцы, зарплаты. На першую зіму красовер ужо пераабуўся ў бабруйскія шыны.
Перш чым даць сваё заключэнне - ці апраўдвае кошт якасць - Прэзідэнт тэстуе кожны аўтамабіль асабіста.
Аўтамабілі ў залежнасці ад камплектацыі абыдуцца ад 17 да 26 тысяч долараў. І дзяржава мае намер падтрымаць будучых уладальнікаў недарагімі крэдытнымі лініямі, бонусамі і растэрміноўкамі.
Прыемная слыху аўтамабіліста, завадчаніна і дзяржавы арыфметыка вялікай справы:
- 8 гадзін адной змены -- 120 аўтамабіляў. Будуць заказы - гатовыя працаваць у дзве змены;
- на першым этапе за год - 60 тысяч аўтамабіляў. Перспектыва - 120. Першыя серыйныя ў продажы ўжо ў лістападзе;
- новая вытворчасць - паўтары тысячы новых працоўных месцаў. З імі жодзінска-барысаўскі кангламерат становіцца сталіцай легкавога аўтапрама Беларусі;
- агульны аб'ём інвестыцый - парадку 400 мільёнаў еўра. Грошы ўкладзеныя з разлікам на еўразійскі рынак і прэміяльны Еўрасаюза;
- пілотная лінейка: тры мадэлі - два кросоверы і кампактны седан. Але завод узвялі ўніверсальным. Зараз сусветная аўтамода на эканомныя гарадскія "паркетнікі". Але калі заўтра мода хіснецца ў бок магутных спарткараў - гатовыя трымаць руку на пульсе.
На што арыентавацца - падказвае само жыццё. Электрамабілі пакараюць свет.
Старт дадзены. Патэнцыйны пакупнік першых беларускіх красовераў узростам ад 20. З перавагамі рознымі і кашальком - бо машына рынку прапаноўваецца адразу ў некалькіх варыянтах: з поўным прывадам, каробкай аўтаматычнай і механічнай, у поўнай камплектацыі - па жаданні заказчыка.
