На тыдні мемарандум аб узаемаразуменні з паркам "Вялікі камень" падпісаў Еўрапейскі банк рэканструкцыі і развіцця. Падпісанне дакумента было адным з пунктаў праграмы афіцыйнага візіту ў нашу краіну віцэ-прэзідэнта банка Алана Пію.
Беларусь і Еўрапейскі банк уступілі ў фазу эфектыўнага партнёрства. Сёння ўплывовы фінансавы інстытут мае ўсе магчымасці, каб нарасціць дзейнасць у нашай краіне - для гэтага склаліся спрыяльныя ўмовы. Пра гэта сам Алан Пію распавёў журналістам па выніках сустрэчы з Прэзідэнтам Аляксандрам Лукашэнкам. За апошнія гады Банк рэканструкцыі і развіцця стаў адным з найбуйнейшых прамых інвестараў у беларускую эканоміку.
Усяго за 25 гадоў супрацоўніцтва банк інвеставаў у Беларусь каля 2 мільярдаў еўра. Ён актыўна ўдзельнічае ў рэформе нацыянальнай банкаўскай сістэмы, фармацэўтычнай галіны, дапамагае сярэдняму і малому бізнесу, укладваецца ў энергаэфектыўнасць і кіраванне дзяржпрадпрыемствамі.
Так, у актыве банка знакавыя інвестпраекты ў прыватным сектары: у сферы дрэваапрацоўкі (завод Kronospan, вытворчасці напояў (бровар "Хайнекен"), рухомага саставу (прадпрыемства "Штадлер Мінск"), праект па развіцці брэнда Mark Formelle.
У дзяржаўным сектары Еўрапейскі банк рэалізаваў праект па развіцці сістэм водазабеспячэння і водаачышчэння ў Віцебску, Слоніме і Баранавічах, Полацку, Лідзе і Оршы. Найбуйнейшыя праекты па ачыстцы сцёкавых вод і цеплавой мадэрнізацыі будынкаў абмяркоўваюцца з беларускай сталіцай.
Найважнейшыя для краіны праекты - мадэрнізацыя дарожнай інфраструктуры. Рэканструкцыя аўтадарог М10 і Р80 - з завяршальным этапам будаўніцтва 2-й Мінскай кальцавой. І ў гэтым кірунку еўрапейскі фінансавы інстытут гатовы да новага супрацоўніцтва.
Алан Пію, віцэ-прэзідэнт Еўрапейскага банка рэканструкцыі і развіцця па пытаннях палітыкі і партнёрства: "Індыкатары беларускай эканомікі паказваюць пазітыўную дынаміку, яны паляпшаюцца па шэрагу кірункаў. У прыватнасці, ёсць эканамічны рост, інфляцыі пад кантролем. Два гады таму мы адмовіліся ад абмежаванняў нашай дзейнасці ў Беларусі. Гэта дазволіла нам істотна нарасціць нашу актыўнасць па інфраструктурных праектах. І мы гатовыя да новага супрацоўніцтва. Размаўляючы з Прэзідэнтам, я адзначыў, што мы вельмі зацікаўленыя ва ўдзеле ў праектах па рэканструкцыі 22 мастоў, якія пабудаваны яшчэ ў савецкі час і маюць патрэбу ў такой рэканструкцыі".
Ужо сёлета паміж Еўрапейскім банкам рэканструкцыі і развіцця і ўрадам Беларусі падпісаны пагадненні аб падрыхтоўцы да прыватызацыі найбуйнейшай піваварнай кампаніі "Крыніца", а таксама Банка Масква-Мінск. Да канца года Еўрапейскі банк разлічвае ўвайсці ў акцыянерны капітал Белінвестбанка. Галоўная рэкамендацыя еўрапейскіх эканамістаў - пачынаць прыватызацыю з тых актываў, якія не маюць праблем і найбольш цікавыя інвестарам. А сам працэс прыватызацыі ў Беларусі павінен быць адкрытым, празрыстым і канкурэнтным. І тут у партнёраў падобныя пазіцыі.
5 дзён візіту, насычаныя перамовамі сустрэчы ў Мінэканомікі, МЗС, Нацбанку, наведванне Парка высокіх тэхналогій, падпісанае пагадненне аб супрацоўніцтве з паркам "Вялікі камень". Чакаецца, што ўжо сёлета штогадовы аб'ём інвестыцый банка ў праекты, што рэалізуюцца ў Беларусі, істотна вырасце.
