Вядомыя хіты "Песняроў", вечар оперы і раманса ад салістаў Вялікага і спектакль "Адвечная песня" беларускага тэатра драматургіі. Вядомыя імёны беларускіх музыкантаў, пісьменнікаў і акцёраў расійскай сталіцы будзе адкрываць Культурны цэнтр пасольства Беларусі ў Маскве. Бо 2016-ы ў нашай краіне, як вядома, аб'яўлены Годам культуры. Наведаць прэм'еры, выставы і канцэрты зможа любы ахвочы. Аб культурнай дыпламатыі наш маскоўскі ўласны карэспандэнт Дар'я Белавусава-Пятроўская.
Будаўніцтва дзелавога і культурнага цэнтра Беларусі пачалося 3 гады таму. Месца абранае невыпадкова. Побач, у былым доме графа Румянцава, знаходзіцца пасольства Беларусі. Там вырашаюцца важныя палітычныя пытанні дзвюх краін. Але дыпламатыя немагчымая без ведання гісторыі і культуры адна адной.
Экскурсію ў мінулае, сучаснасць, а, галоўнае, будучыню культурнага цэнтра нам праводзіць саветнік-пасланнік пасольства Беларусі. Юрый Ярашэвіч тут ведае кожны куток. Канцэпцыя будынка простая і цікавая. Зайдучы сюды, ты можаш апынуцца адразу ў чатырох порах года: зіма, вясна, лета і восень - для кожнага паверха сваё надвор'е.
Юрый Ярашэвіч, саветнік-пасланнік пасольства Рэспублікі Беларусь у Расійскай Федэрацыі: "Зараз мы з вамі знаходзімся на трэцім паверсе, які сімвалізуе сабою восень, і гэта вельмі лёгка зразумець. Гэтыя калоны ўвасабляюць сабою снапы, ураджай наш беларускі, часта вельмі багаты. Ланцужкі на вокнах увасабляюць дождж, які ў нас часта ідзе. Так і напамінак аб нашай гісторыі, рыцарскіх турнірах, кальчугах".
З моманту адкрыцця, а афіцыйна цэнтр працуе ўжо 4 месяцы, ён ператварыўся ў сімвалічны культурны масток паміж Беларуссю і Расіяй. Напрыклад, пазнаёміцца з беларускім кінематографам 20-30-хх гадоў ХХ стагоддзя можна праз выставу кінаплаката. А са спектаклямі Купалаўскага тэатра - праз унікальныя касцюмы і эскізы да вядомых пастановак.
Юрый Ярашэвіч, саветнік-пасланнік пасольства Рэспублікі Беларусь у Расійскай Федэрацыі: "Напрыклад, у нас у найбліжэйшых планах творчы вечар мастацкага кіраўніка Купалаўскага Пінігіна. Мы збіраемся прывезці яго сюды са спектаклем, зрабіць творчы вечар, правесці прэс-канферэнцыю. Для таго каб зацікавіць нашага маскоўскага і расійскага гледача ў далейшай арганізацыі гастроляў".
"Лявоніха", "Касіў Ясь канюшыну", "Белавежская пушча". На гэтым тыдні ў сценах Культурнага цэнтра Беларусі гучалі самыя вядомыя песні Уладзіміра Мулявіна. У гонар 75-годдзя легендарнага беларускага паэта і музыканта ансамбль "Песняры" выканаў кампазіцыі, якія ўжо дзясяткі гадоў падпяваюць жыхары абедзвюх дзяржаў. Творы Мулявіна музычна аб'ядналі дзве краіны. Нарадзіўся ў Свярдлоўску, сучасны Екацярынбург, а сэрца аддаў беларускай песні. Ён адпраўляўся ў творчыя экспедыцыі ў беларускія сёлы і вёскі, збіраў народны фальклор і дзякуючы сучаснай аранжыроўцы даваў яму новае жыццё.
Вячаслаў Шарапаў, мастацкі кіраўнік ансамбля "Песняры": "Мулявін беларускую мову чуў вушамі рускага чалавека. Усе самыя прыгожыя словы, усе самыя прыгожыя выразы ён умеў падняць на паверхню і паднесці гледачу. Таму ўсе песні "Песняроў", усё тое, што прайшло праз Уладзіміра Георгіевіча, палюбілася ў Расіі".
Культурны цэнтр - гэта яшчэ і сувязь з беларускай дыяспарай. Напрыклад, толькі ў Маскве жывуць і працуюць больш як 50 тысяч нашых суайчыннікаў, а ў Расіі - каля паўмільёна беларусаў.
Ігар Петрышэнка, Надзвычайны і Паўнамоцны Пасол Рэспублікі Беларусь у Расійскай Федэрацыі: "У кастрычніку 2015 года на базе ДКК таксама адкрылася Зала беларускай дыяспары. Апроч звыклага напаўнення, для суайчыннікаў тут адкрыты доступ да рэсурсаў Нацыянальнага цэнтра прававой інфармацыі і віртуальнай чытальнай залы Нацыянальнай бібліятэкі Беларусі. Сёлета адкрыюцца курсы па вывучэнні беларускай мовы, гісторыі і культуры, пройдуць разнастайныя творчыя, дзелавыя, навуковыя і культурныя сустрэчы, накіраваныя на захаванне беларускай культуры, мовы, традыцый".
2016-ы аб'яўлены Годам культуры ў Беларусі. Канцэрт "Песняроў" у Маскве даў яму старт на расійскай зямлі. На працягу года тут выступяць ансамблі "Сябры", "Харошкі", Тэатр песні Ірыны Дарафеевай, пройдзе вечар опернай музыкі і раманса Нацыянальнага цэнтра сучасных мастацтваў. Таксама адбудуцца мерапрыемствы, прысвечаныя 30-й гадавіне чарнобыльскай трагедыі, Дню яднання народаў Беларусі і Расіі, Дню Перамогі.
