Адкрыццё стадыёна "Дынама" ў Беларусі - падзея ў спартыўным свеце нерадавая. Бо гэтая арэна стане пляцоўкай для "каралевы спорту" - тут будуць рыхтавацца і спаборнічаць лёгкаатлеты. Спецыяльна на ўрачыстую цырымонію адкрыцця абноўленага "Дынама" ў Мінск прыбыў двухразовы алімпійскі чэмпіён, а цяпер кіраўнік Міжнароднай асацыяцыі лёгкаатлетычных федэрацый Себасцьян Коэ.
Са спартыўным функцыянерам прама на арэне сустрэўся Прэзідэнт Аляксандр Лукашэнка. Падчас размовы абмеркавалі будучыя маштабныя спаборніцтвы, якія будзе прымаць "Дынама". Найбліжэйшыя з іх - II Еўрапейскія гульні, а таксама першы ў гісторыі лёгкаатлетычны матч зборных Еўропы і ЗША ў верасні 2019. Асобна спыніліся і на тэме допінгу. Беларускі лідар і кіраўнік аўтарытэтнай міжнароднай арганізацыі выказалі салідарнасць у тым, што спорт павінен быць чыстым.
