Не толькі апярэдзіць сусветных канкурэнтаў па тэмпах развіцця, пашырыць геаграфію паставак сваёй прадукцыі, але і выйсці на дакрызісныя аб'ёмы вытворчасці змаглі на Бабруйскім машынабудаўнічым заводзе. Плюс 25 % дзякуючы мадэрнізацыі і, як гавораць на прадпрыемстве, агрэсіўнай палітыцы прасоўвання свайго тавара. Лідар па вытворчасці помпаў для нафтавай і горназдабыўной прамысловасці ў часы Савецкага Саюза, тут і сёння выпускаюць звыш ста тыпаразмераў агрэгатаў. І застаюцца асноўным пастаўшчыком прадукцыі на тэрыторыі СНД.
Пра тое, як энергетычная бяспека першых краін свету куецца менавіта ў Бабруйску, рэпартаж Андрэя Ястрабава. Мільёны тон металу прайшлі праз цэх Бабруйскага машынабудаўнічага за яго векавую гісторыю. Вызначальным стаў 1951-ы год, калі з канвеера сышла першая цэнтрабежная помпа. Трэба было выбірацца з ваенных руін і актыўна наладжваць узаемаадносіны з дружалюбнымі краінамі. Дарэчы, Асуанскую плаціну ў Егіпце пабудавалі дзякуючы помпам бабруйскага завода.
Адна такая помпа здольны адпрацаваць амаль 30 гадоў без замены пры тэмпературы ад мінус 80 да плюс 400 градусаў. На першы погляд просты агрэгат. Насамрэч у ім амаль тысяча дэталяў.
У 2011-м завод увайшоў у склад міжнароднага холдынга. На выручаныя дзякуючы акцыянаванню грошы ўжо праз год пачалі маштабную мадэрнізацыю ліцейнай і апрацоўчай вытворчасцяў. Да канца пяцігодкі адзін сучасны станок мог выконваць працу за траіх.
І вось ужо прадукцыяй прадпрыемства зацікавіліся новыя заказчыкі. Вектар гандлю - азіяцкія краіны.
Дарэчы, у Якуцку гэтаму 5-тоннаму смаўжу, так назвалі беларускую горназдабыўную помпу, усталявалі помнік. Сярод заказчыкаў бабруйскага завода нашы "Нафтан" і "Беларуськалій", жыллёва-камунальная галіна. Яшчэ адзін плюс - тут укараняюць у вытворчасць свае ж распрацоўкі. На рахунку 5 патэнтаў. І гэта толькі пачатак, гавораць на прадпрыемстве.
Валерый Ліхман, дырэктар ААТ "Бабруйскі машынабудаўнічы завод": "Распрацавалі праграму новай тэхнікі на 15-18 гады, таксама пачалі распрацоўку новай канструкцыі помп, якія будзем прасоўваць на рынку. Састарэлая прадукцыя не патрэбна нікому. Канкурэнты выходзяць на рынак з больш удасканаленай".
Мадэрнізацыя прынесла прадпрыемству дадатковыя 25 % аб'ёмаў вытворчасці. 2016-ы пачалі з прыбытку. Як гавораць тут, апярэдзілі час на год. Пагадзіўся з гэтым і старшыня галоўнага медыяхолдынга краіны. Сёння Генадзь Давыдзька пагутарыў з калектывам завода і адзначыў, што гэта добры сігнал для беларускай эканомікі.
Генадзь Давыдзька, Старшыня Белтэлерадыёкампаніі: "Тут у 15-м годзе быў рост і вытворчасці, і продажаў. Так, пэўная мадэрнізацыя праведзена і працягваецца. Але настрой людзей палепшыўся ад таго, што яны ўбачылі вынікі сваёй працы. Значыць, магчымыя і новыя вынікі. І насуперак чаканаму падзенню да 16-га года на гэтым прадпрыемстве чакаецца рост і вытворчасці, і продажаў".
У планах прадпрыемства - развіццё сэрвіснага абслугоўвання ў краінах - імпарцёрах бабруйскіх помп, падрыхтоўка ўласных спецыялістаў і абавязкова новыя кантракты.
