Ва ўборцы лёну некаторыя раёны краіны перасеклі экватар. Дзесьці нават фінішавалі. Да адзнакі 90 % убраных плошчаў набліжаюцца на паўднёвым усходзе. У Гомельскай вобласці сёлета пад лён аддалі на 500 гектараў больш, чым у 2018. Сеялі толькі ў шасці лепшых раёнах. Вырашчаную сыравіну чакаюць і на мясцовых заводах, і на прадпрыемствах у іншых абласцях, і нават у іншых краінах. Пры гэтым асартымент прадукцыі з беларускага лёну на заводах пастаянна пашыраюць. Пра эканоміку беларускага шоўку ў рэпартажы Ганны Кавалёвай.
Ігар Бадзянкоў лён убірае 17-ы раз. У сваім калектыве перадавік. Сакрэты поспеху па спадчыне атрымаў ад бацькі. Сёння за рулём з 7 раніцы. З ім на кармянскіх палях яшчэ 24 трактарысты.
Убраць лён - не поле перайсці, жартуюць аграномы. Культура капрызная. Часам можа і зусім не ўзысці. У яе райдары цэлы набор аграхімічных паказчыкаў. Глеба не павінна быць кіслай. Фосфару і калію не менш за 200 міліграмаў на кілаграм. А пасля ўборкі поле павінна адпачыць мінімум 5 гадоў. Пакуль жа культуру зрэзалі і пакінулі адпачываць прыкладна на 20 дзён.
Віктар Кавалёў, дырэктар філіяла ААТ "Гомельлён" "Кармянскі льнозавод": "Мы трымаем лён-даўгунец, які падышоў да стадыі цераблення. Вы бачыце, ужо галоўкі гатовыя, карычневага колеру. Гэта гаворыць пра тое, што поўная спеласць".
У раёне сеюць 9 сартоў. Амаль усе беларускай селекцыі. Флагманскі - "гранд". Ён самы ўстойлівы. А для паўднёвага-ўсходу краіны гэта асабліва важна. Дарэчы, сёлета, каб мінімізаваць страты ад спякоты, гомельскія палі апрацавалі спецыяльнымі прэпаратамі. У іх мікраэлементы, якія затрымліваюць вільгаць і дапамагаюць расліне выжыць. Таму заводы без сыравіны не застануцца.
Пасля таго як лён выцераблены і адляжаўся, яго згортваюць вось у такія рулоны. Прывозяць сюды, на льнозавод. Тут яго чакае апошні вытворчы этап.
Усяго ад зернятка да гатовай сыравіны - 28 тэхналагічных этапаў. На Кармянскім льнозаводзе на вынік працуюць круглыя суткі. Новая лінія не спыняецца і зімой. Вытворчасць безадходная. Нават з умоўнага льнянога смецця тут выпускаюць экалагічную прадукцыю - паліўныя брыкеты. У месяц 100 тон. Для параўнання, адна тона такога льнянога паліва замяняе адразу 4 тоны дроў. Аднак мэтавае прызначэнне завода - усё ж сыравіна для лёгкай прамысловасці.
І гэта не адзінае, у што ў выніку можна ператварыць лён.
Напрыклад, тут, у Гродне, дзякуючы інавацыйным тэхналогіям з беларускага шоўку вырабляюць ватовыя вырабы, спецыяльную бялізну, прасціны і тавары для нованароджаных. Натуральная сыравіна - лён - дазваляе атрымліваць прадукцыю не толькі з пазнакай "высокая якасць", але і са знакам стапрацэнтнай экалагічнасці.
Экспартны партфель беларускіх льнозаводаў пастаянна пашыраецца. Толькі з Кармы прадукцыю пастаўляюць у Кітай і Прыбалтыку. Эканамічная выгада адчувальная, бо сыравіна выключна ўласная. Сёлета гаспадаркі краіны павялічылі пасяўныя плошчы, а мадэрнізацыя вытворчасцяў спрыяе паляпшэнню якасці беларускага шоўку.
Ва ўборцы лёну некаторыя раёны перасеклі экватар
8 августа 2019