Увага да беларусаў, чые выдаткі перавышаюць афіцыйныя прыбыткі, стане больш пільнай. Новыя нормы прапісаныя ў праекце закона "Аб дэклараванні фізасобамі прыбыткаў і маёмасці". Дакумент паступіў у парламент і рыхтуецца да разгляду дэпутатамі. Падатковыя службы плануецца надзяліць правам запатрабаваць у грамадзяніна справаздачу аб прыбытках, не чакаючы заканчэння каляндарнага года. Акрамя таго, у новай версіі закона зацвердзяць строгія тэрміны падачы тлумачэнняў для тых асоб, якіх падазраюць ва ўхіленні ад выплаты падаткаў. Растлумачыць, чаму разыходжанні заробкаў з выдаткамі істотныя, можна будзе толькі ў 30-дзённы тэрмін.
Валерый Барадзеня, член Пастаяннай камісіі Палаты прадстаўнікоў Нацыянальнага сходу Беларусі: "Сёння гэтыя тэрміны так выразна не ўстаноўленыя, і людзі могуць там усякімі манеўрамі зацягваць гэтыя тэрміны разгляду. Зараз гэта будзе ўжо складаней. Я лічу, што гэта правільны шлях. У прынцыпе, ва ўсім свеце так яно і робіцца. Калі ў чалавека выдаткі відавочна перавышаюць афіцыйныя прыбыткі, то дзяржава неназойліва просіць яго растлумачыць, чаму так".
Калі тлумачэнні грамадзяніна падатковую не задаволілі, яму прыйдзецца заплаціць падаходны падатак. Дарэчы, з пачатку года для тых асоб, якія жывуць не па сродках, стаўку падатку павялічылі да 16%.
