У Глыбоцкім раёне ўкараняюць сістэму дакладнага земляробства. Цэнтр, дзе вывучаюць прынцыпы IT-падыходу да працы на зямлі, функцыянуе на базе Глыбоцкага прафесійнага ліцэя. У яго аснове лічбавыя тэхналогіі, якія дазваляюць жорстка кантраляваць расход паліва і ўгнаенняў, разлічваць час пасадкі культур і апрацоўкі палёў. У ліцэі ўсталявана ўласная метэастанцыя для атрымання дакладнага прагнозу надвор'я. Ад правільна выбранага часу працы ў полі напрамую залежыць ураджайнасць культур. Вучэбныя ўгоддзі апрацоўваюць энерганасычаным трактарам, якім кіруе аўтапілот. Такім чынам механізатар можа канцэнтравацца выключна на якасці ўзворвання або сяўбы.
У найбліжэйшыя 5 гадоў сістэму дакладнага земляробства ў Беларусі плануюць укараніць паўсюдна. Таму новыя веды запатрабаваныя не толькі моладдзю. У Глыбоцкім ліцэі плануюць адкрыць курсы для работнікаў аграпрамысловага комплексу.
