Святочнымі стануць гэтыя дні для жыхароў Жодзіна. Горад адзначае дзень нараджэння. І ўжо па традыцыі напярэдадні Дня машынабудаўніка, які краіна адзначыць заўтра, БелАЗ адчыніў свае дзверы для ўсіх ахвочых. Госці "краіны аўтагігантаў" маглі на свае вочы ўбачыць, як нараджаюцца самыя вялікія грузавікі ў свеце. І, вядома, знакамітае сэлфі на фоне рэкардсмена Кнігі Гінеса - самазвала, грузападымальнасць якога 450 тон. Яго маштабы ацаніў і Аляксандр Харавец.
На гэтай пляцоўцы ля завода - дасягненні БелАЗа за 67 гадоў. Тут і невялікія самазвалы, і вялікіх памераў машыны, якія ўпэўнена калясяць па ўсім свеце. А зусім хутка гэтыя аўтагіганты змогуць працаваць у кар'ерах фактычна без прамога кіравання машыністам. Над іх самастойнасцю сёння працуе, у тым ліку, і Аляксей Ладкоў. Зараз самазвалы праходзяць апошнія выпрабаванні.
Не толькі ўбачыць машыны, якія перавозяць сотні тон грузаў, але і паглядзець як нараджаюцца аўтаволаты сёння мог любы ахвочы. Раз на год у дзень нараджэння горада мегазавод расчыняе свае дзверы.
БелАЗ - адзін з найбуйнейшых у свеце і адзіны ў СНД вытворца кар'ернай тэхнікі. На прадпрыемстве выпускаюць самазвалы ад 30 да 450 тон. 8 новых мадэляў сёння прадставілі на гэтай пляцоўцы.
Пётр Пархомчык, гендырэктар ААТ "БелАЗ": "Два даследчыя ўзоры мы дэманстравалі ў Сочы на форуме. Гэты волат-пагрузчык грузападымальнасцю 22 23 тоны ён быў прама на выставе прададзены і рухаецца ў бок Кемераўскай вобласці. Мяркую, праз два-тры тыдні пачне працаваць".
Яшчэ адна новая мадэль самазвала адправілася ў кар'еры Якуціі здабываць алмазы.
