Міністр прамысловасці Беларусі Дзмітрый Кацярыніч сустрэўся з кіраўніцтвам сумеснага прадпрыемства ТАА АВІК-БелАЗ Кар'ерныя машыны і партнёра па СП - карпарацыі АВІК. Бакі абмеркавалі перспектывы развіцця сумеснага прадпрыемства, папулярызацыі яго прадукцыі. Сёння будзе падпісаны кантракт на пастаўку БелАЗаў і запчастак на суму 12 мільёнаў долараў, а таксама кар'ернай тэхнікі на 9 мільёнаў долараў. Акрамя таго, адбылася сустрэча з кіраўніцтвам карпарацыі Джылі. Тут абмеркавалі праект арганізацыі ў Беларусі вытворчасці легкавых аўтамабіляў. Сёння падпішуць пагадненне аб супрацоўніцтве.
Таксама абмяркоўваліся пытанні наконт стварэння ў свабоднай эканамічнай зоне Магілёў прадпрыемства па вытворчасці чыгуначнага ліцця. У кітайскіх партнёраў - кампаніі Сімэір - ёсць цікавасць па ўваходжанні ў Магілёўскі вагонабудаўнічы завод як акцыянера з мэтай вытворчасці там крыягенных цыстэрнаў, а таксама вагонаў для ЕС. Аб'ём інвестыцый складзе 80 мільёнаў еўра.
