Буйная партыя пажарных аварыйна-выратавальных машын адправілася ва Улан-Батар

Спецтэхніка на экспарт для бяспекі цэлай краіны. Буйная партыя пажарных аварыйна-выратавальных машын адправілася з Барысава ва Улан-Батар. 

Гэта сумесны праект барысаўскіх і мінскіх спецыялістаў. 25 аўтацыстэрнаў зроблены з улікам кліматычных асаблівасцяў Манголіі. Пра інавацыі і новыя міжнародныя эканамічныя сувязі з горада на Бярэзіне  - рэпартаж Аляксея Кандраценкі.

 За плячыма плённая праца, а наперадзе - шлях даўжынёй  сем тысяч кіламетраў. 25 новых аўтацыстэрнаў накіроўваюцца на працу з Барысава ва Улан-Батар. Манголія - рэгіён з няпростымі кліматычнымі ўмовамі. Аднак нашы машынабудаўнікі да гэтага падрыхтаваліся.  

Да асновы - шасі МАЗ - дадаюць інавацыйныя распрацоўкі кампаніі з Барысава, дзе ёсць штат сваіх інжынераў і канструктараў. Адзін з актуальных трэндаў - не толькі дызайн і карысныя функцыі машын, але і лёгкія і звыштрывалыя матэрыялы. 

Большая частка кабіны, як і сама цыстэрна на 5 тысяч літраў, з арміраванага шклапластыку. Матэрыял антыкаразійны. У такой машыне ўсё прадумана для эфектыўнай работы. 

Тэхніка прадпрыемства запатрабавана і ў нашай краіне. Адно з ноу-хау – аўталесвіца на 32 метры - зараз на тэст-драйве ў барысаўскіх ратавальнікаў. Экспарт кампаніі - гэта яшчэ і Арменія, В'етнам, Казахстан, Расія. Важна не толькі прадаць, але ў патрэбны момант адрамантаваць тэхніку. Для гэтага ствараюць сэрвісныя лакальныя і міжнародныя цэнтры. 

А сёлета па кантракце ў Манголію усяго экспартуюць 73 розныя аварыйна-выратавальныя машыны, сярод іх эксклюзіўная тэхніка - мабільныя шпіталі.