Звыш 740 тысяч тон зараз важыць каравай Мінскай вобласці: палі абмалацілі больш чым на трэць. Наліўныя каласы важна ўбраць хутка і без страт - ад гэтага залежыць, наколькі шчодрым будзе агульны ўраджай. Аграрыі ведаюць: за залатым збожжам дабрабыт сям'і, эканоміка гаспадаркі і, безумоўна, харчовая бяспека. З працавітымі і самаадданымі героямі жніва пазнаёмілася Алена Вітко.
Асабісты ўклад кожнага хлебароба ў агульны каравай
У палях ад першых прамянёў да заходу сонца. Такі насычаны графік зараз у аграрыяў усяго рэгіёна. У "Азярыцкім-Агра", напрыклад, убраць трэба каля 3 тысяч гектараў залатых палёў. Камбайны малоцяць нон-стоп, тут жа прэс-падборшчыкі, машыны для адвозкі - тандэм ідэальны.
Усяго на ўраджайны марафон выйшлі 13 камбайнаў. Поўнасцю ўбралі азімы ячмень - з гектара ўзялі па 60 цэнтнераў. Зараз жа асвойваюць шчодрыя пшанічныя палеткі.
Родныя браты, тата і сын. Гаспадарка, што ў Смалявіцкім раёне, багатая на сямейныя дынастыі. Таму і сустрэчы ў перапынку цёплыя. Падсілкоўваюцца - і тут жа абмяркоўваюць тэхнічныя пытанні. Дзеляцца таксама ўраджайнымі поспехамі.
Свайго героя жніва - камбайнера Генадзя Ездакова - сустракае вялікая сям'я. Пшанічнае поле механізатар убіраў якраз насупраць дома. Наваселле святкавалі літаральна год таму. Свой куток для шматдзетных бацькоў - гэта і пра камфорт, і пра гаспадарлівасць.
Для апантанага камбайнера гэта шосты хлебны сезон. Залаты ўраджай збіраць у адным экіпажы сёлета прапанаваў брату Аляксандру. Тым часам падрастаюць і малодшыя памочнікі.
З аддачай і адказнасцю, старанна - мясцовыя аграрыі працуюць па 12 гадзін, а то і больш. Хоць кароткачасовыя дажджы часам і ставяць жніво на паўзу, надвор'е спрыяе. У "Азярыцкім-Агра" ўжо здалі дзяржзаказ. Агульны каравай чакаюць у 18 тысяч тон.
