Планавыя адменяць, а пералік падстаў для праверак значна скароцяць.
Сёння Прэзідэнт падпісаў адпаведны ўказ. Ён стане часткай вялікага пакета дакументаў па лібералізацыі бізнесу. З новага года прыйсці на прадпрыемства кантралёры змогуць, толькі калі дакладна ведаюць аб парушэннях. А праз год падставай для праверкі стануць высокія рызыкі невыканання закона з боку прадпрымальніка. Крытэрыі ацэнкі трэба будзе вызначыць ураду. Інфармацыя аб праверках будзе адкрытай. Яе размесцяць на сайце дзяржкантролю. Кожны бізнесмен зможа загадзя даведацца, ці прыйдуць да яго кантралёры.
Таццяна Чухлей, намеснік начальніка ўпраўлення Камітэта дзяржкантролю Беларусі:
"Агульны падыход будзе такім: пазапланавая праверка можа быць прызначана, калі ў кантрольнага або нагляднага органа маюцца канкрэтныя звесткі аб дапушчаных гэтым суб'ектам парушэннях. Увесь наступны год у Беларусі будуць праводзіцца толькі пазапланавыя праверкі. З 1 студзеня 2019 года ўводзяцца выбарачныя праверкі. Гэта новая катэгорыя для нацыянальнага заканадаўства. Выбарачныя праверкі будуць прызначацца пры высокай ступені рызыкі ўчынення суб'ектам, які правяраецца, парушэнняў заканадаўства".
Кантралёры больш не змогуць выносіць загады аб прыпыненні працы прадпрыемстваў - зараз гэта можна зрабіць толькі ў судовым парадку. Узмоцнена і адказнасць кантралёраў за парушэнне парадку праверак: калі для іх няма сур'ёзных падстаў або перавышаны тэрміны кантролю. Таксама на траціну скарочана колькасць органаў, упаўнаважаных праводзіць праверкі. Новыя правілы кантролю за бізнесам пачнуць працаваць з 1 студзеня.
