Беларусь прапануе Германіі стварыць высокатэхналагічны кластар у Кітайска-беларускім індустрыяльным парку "Вялікі камень". Пра магчымасці двухбаковага супрацоўніцтва ішла размова сёння на сустрэчы Прэм'ер-міністра Андрэя Кабякова з Надзвычайным і Паўнамоцным Паслом Германіі ў Беларусі Петэрам Дэтмарам.
Апошні час узаемны тавараабарот скараціўся. І ўлічваючы стабільнае ўзаемавыгаднае супрацоўніцтва дзвюх краін, Беларусі і Германіі неабходны новыя формы эканамічнага ўзаемадзеяння, адной з якіх магла б быць глыбокая прамысловая кааперацыя.
Андрэй Кабякоў, Прэм'ер-міністр Беларусі: "Германія для Беларусі з першых дзён незалежнасці з'яўляецца адным з ключавых замежных партнёраў. І мы ўдзячныя Германіі за тую падтрымку рашэнняў Савета ЕС аб адмене санкцый у дачыненні да нашай краіны. І зараз я хачу яшчэ раз паўтарыць, што складваецца ўнікальная магчымасць вывесці нашы адносіны на якасна новы ўзровень".
У сваю чаргу Петэр Дэтмар падзякаваў Андрэю Кабякову за сардэчны прыём і выказаў упэўненасць у пашырэнні палітычных і гандлёва-эканамічных адносін паміж краінамі.
