Беларусь актыўна працуе ў напрамку рэгіянальнага супрацоўніцтва. Так, на сустрэчы з губернатарам Сахалінскай вобласці беларускі лідар заявіў аб гатоўнасці нарошчваць узаемадзеянне з гэтым рэгіёнам. У найбліжэйшы час Сахалін павінен стаць драйверам эканамічнага росту на Далёкім Усходзе. І Беларусь зацікаўленая ўдзельнічаць у стварэнні на гэтай тэрыторый апераджальнага сацыяльна-эканамічнага развіцця. Акрамя таго, нашы прадпрыемствы гатовыя прыняць самы актыўны ўдзел у будаўніцтве аўтадарог і лагістычных цэнтраў у расійскім рэгіёне. У планах актыўна нарошчваць і двухбаковы тавараабарот.
Усе падрабязнасці ў рэпартажы Ілоны Красуцкай.
Апошнімі днямі беларусы пільна сачылі за навінамі з Сахаліна. У пятніцу на астраўны рэгіён абрынуўся ўдар адразу дзвюх стыхій - паводкі і ўрагану. Магутны цыклон прынёс моцныя ліўні, парывы ветру дасягалі 63 метры за секунду. Вецер вырываў з коранем дрэвы, перакульваў машыны. Кожны пяты жыхар паўвострава застаўся без святла. На паўднёвым беразе хвалі дасягалі 4 метраў. 1 чалавек загінуў, 25 пацярпелі. У рэгіёне быў уведзены рэжым надзвычайнай сітуацыі.
Кіраўнік вобласці Алег Кажамяка перарывае работу на інвестфоруме ў Сочы і тэрмінова вылятае на Сахалін. Новы губернатар адразу ж адпраўляецца ў пацярпелыя раёны. Нягледзячы на тое, што на пасадзе кіраўніка рэгіёна Алег Кажамяка знаходзіцца ўсяго два тыдні, ён дакладна ведае, як дзейнічаць у такой сітуацыі. Чыноўнік мае каласальны вопыт кіравання далёкаўсходнімі абласцямі.
Яго называюць губернатарам трох рэгіёнаў. Пачаў сваю кар'еру як кіраўнік Камчаткі, а ўжо ў 2008-м яму даручылі пасаду губернатара Амурскай вобласці.
Менавіта на гэтай пасадзе апошнія некалькі гадоў Кажамяка бачыўся з Кіраўніком беларускай дзяржавы. Па збегу акалічнасцяў падчас тых візітаў гаварылі наконт дапамогі пацярпеламу ад паводкі Прыамур'ю.
Калі здарылася бяда, Беларусь адрэагавала неадкладна. Гуманітарны груз вагой 40 тон (прадукты харчавання і рэчы першай неабходнасці) былі адпраўленыя ў пацярпелыя раёны.
Новая сустрэча з беларускім Прэзідэнтам была запланаваная задаўга, і адмяніць яе кіраўнік Сахалінскай вобласці проста не мог. Час ідзе, мяняюцца пасады і рангі, але добрыя чалавечыя адносіны па-ранейшаму застаюцца гарантам партнёрства.
Зрэшты, у Беларусі і астраўнога рэгіёна пакуль няпросты і эканамічны клімат. Тавараабарот нязначны – каля 2 мільёнаў долараў. Адчуваецца тэрытарыяльная аддаленасць (ад Мінска да Сахаліна 7 тысяч кіламетраў, 9 гадзін лёту), складаная лагістыка. Але, як паказвае практыка, часта геаграфія прайграе эканоміцы. Два тыдні таму на форуме рэгіёнаў у Сочы Беларусь заключыла пагадненні аб супрацоўніцтве з пяццю рэгіёнамі Расіі. Сярод іх і Сахалінская вобласць. Сёння ў Палацы Незалежнасці вызначылі топ перспектыўных праектаў.
Згодна з праграмай урада, у найбліжэйшыя гады Сахалінская вобласць павінна стаць драйверам эканамічнага росту на Далёкім Усходзе. У астраўным краі вызначаныя тэрыторыі апераджальнага сацыяльна-эканамічнага развіцця. Пакуль гэта дзве пляцоўкі - Холмск і Невельск. У гарадах запланавана будаўніцтва агра- і тэхнапаркаў. Як нельга дарэчы Беларусь прапануе абнавіць узаемадзеянне ў прамкааперацыі і сельскай гаспадарцы.
Сахалін - зона рызыкоўнага земляробства. Але і там прымудраюцца збіраць добрыя ўраджаі. Безумоўна, не без дапамогі беларускай тэхнікі. Нашы трактары, камбайны добра зарэкамендавалі сябе на Далёкім Усходзе.
Лінейны рад беларускай тэхнікі пашыраецца і з улікам кліматычных умоў. Зіма на Сахаліне можа прыйсці раней за каляндарную, таму наконт паставак снегаўборачнай тэхнікі дамовіліся яшчэ летам.
Сахалінская вобласць з'яўляецца адным з лідараў у Расіі па здабычы нафты і газу. Насельніцтва, па сутнасці, як у Гомелі - паўмільёна чалавек. Астраўны рэгіён прызнаны адным з самых малазаселеных у Расіі. Тым не менш, згодна з прагнозамі, на працягу найбліжэйшых 15 гадоў насельніцтва павінна павялічыцца да 800 тысяч. Акрамя будаўніцтва жылых масіваў, сацыяльнай інфраструктуры, апдэйт спатрэбіцца і транспартнай лінейцы.
Ужо сёлета ўпершыню на вуліцах Паўднёва-Сахалінска можна будзе ўбачыць нізкападлогавыя аўтобусы брэнда МАЗ. А вось грузавікі на паўвостраў Мінскі аўтамабільны паставіў яшчэ 12 гадоў таму. Сёння, карыстаючыся нагодай, кіраўнік рэгіёна правёў тэст-драйв абноўленых мадэляў.
Андрэй Чумак, намеснік начальніка ўпраўлення ААТ "Мінскі аўтамабільны завод": "З гэтай пастаўкі МАЗ вядзе комплексную стратэгію папулярызацыі сваёй пасажырскай тэхнікі. Мы плануем стварыць там склад запчастак. Наладзяць і падтрымку сэрвісу ў гэтым рэгіёне для таго, каб тэхніка эксплуатавалася 24 гадзіны за суткі без прастою".
Перамовы сёння адбыліся і ў беларускім урадзе. Дамовіліся наконт стварэння рабочай групы. Яе ўзначаліць намеснік старшыні ўрада Сахалінскай вобласці. Доўгі экскурс Сяргею Хотачкіну (Хаточкіну) не спатрэбіцца. Беларус, нарадзіўся і вырас у Мінску. За кансультацыі з беларускага боку адказны міністр сельскай гаспадаркі і харчавання Леанід Заяц.
З'яўленне на вуліцах Мінска расійскага трыкалора - з'ява прывычная. Дэлегацыя Сахалінскай вобласці сёлета дзясятая. І кожны раз перамовы пачынаюцца не з абмеркавання шматмільённых кантрактаў, а з гістарычнай памяці: падзякі і павагі людзям, якія цаной уласнага жыцця падарылі пакаленням незалежнасць.
Візіт сахалінскай дэлегацыі разлічаны на два дні. Праграма вельмі насычаная: заўтра гасцей чакаюць на МТЗ, у Акадэміі навук і агракамбінаце "Ждановічы". Вечарам спецрэйс вылеціць на Сахалін. Бо ўжо ў сераду ў губернатара рэгіёна запланаваная важная нарада. Прагнозы сіноптыкаў несуцяшальныя. У гэтую пятніцу Сахалін зноў можа апынуцца пад уладай непагадзі.
