А. Лукашэнка пра электразарадныя станцыі: Калі хтосьці хоча - нават ля парога дома

Аб працы беларускай энергетыкі гаварылі сёння ў Палацы Незалежнасці. Пра ўсе аспекты функцыянавання галіны далажылі міністр, профільны віцэ-прэм'ер і памочнік прэзідэнта. Магутнасць нацыянальнай энергасістэмы перавысіла 10 тысяч мегават - гэта больш за 280 тысяч кіламетраў электрасетак. Для разумення маштабу, імі можна амаль сем разоў абагнуць Зямлю па экватары. Энергетычны комплекс - важная галіна эканомікі, асабліва з улікам рэалізацыі найбуйнейшага інвестпраекта ў гісторыі краіны. Беларускай АЭС ужо выдадзена ліцэнзія на эксплуатацыю першага энергаблока. Наперадзе прамысловае выкарыстанне. Прэзідэнта цікавілі крокі ўрада па павелічэнні спажывання электраэнергіі ўнутры краіны і на экспарт. 

Прэзідэнт даручыў будаваць больш электразарадных станцый

Што датычыцца павелічэння спажывання электраэнергіі, то тут урад дзейнічае паслядоўна, ствараючы ўмовы для нарошчвання выкарыстання гэтага віду энергіі ў жылых дамах, развіваючы электратранспарт і інфраструктуру - гэта перспектыўна. Пераход на электрамабілі анансуюць шматлікія краіны свету, Беларусь таксама будзе спрыяць прасоўванню экатранспарту, адзначыў Аляксандр Лукашэнка. За апошнія два гады ў краіне з'явілася каля 200 электразарадных станцый,  яшчэ столькі ж пабудуюць да канца  бягучага года. 

У Беларусі вырасла электраспажыванне ў жылфондзе

Для росту электраспажывання ў краіне створаны стымулы: гэта і льготныя тарыфы, і пакрыццё часткі выдаткаў на куплю электраабсталявання. У Мінэнерга адзначылі, што меры эфектыўныя. У жылфондзе выкарыстанне электраэнергіі павялічылася кратна. Урад прагназуе, што гэты рост працягнецца  і ў рэальным сектары, і пры выкарыстанні насельніцтвам. 

Закранулі на сустрэчы і пытанні рэалізацыі буйных інвестпраектаў. У прыватнасці, Прэзідэнту далажылі пра запуск кардоннай фабрыкі ў Добрушы. З канвеера ўжо сыходзіць першая прадукцыя. Запуск вытворчасці дазволіць задаволіць высокі ўнутраны попыт, замясціўшы імпарт. Аляксандр Лукашэнка адзначыў, што мае намер наведаць гэта прадпрыемства.