У Міністэрстве аховы здароўя Беларусі паведамілі аб стане пацярпелых пры абвальванні неэксплуатуемага моста ў Лідскім раёне. У іх траўмы рознай ступені цяжкасці, у тым ліку чэрапна-мазгавыя, пераломы, пашкоджанні ўнутраных органаў і грудной клеткі. Двое знаходзяцца ў аддзяленні рэанімацыі і інтэнсіўнай тэрапіі, трэці пацыент праходзіць дадатковае абследаванне.
Нагадаем, надзвычайнае здарэнне адбылося падчас дэмантажу пераправы цераз раку Нёман. У вадзе апынулася пліта, два чалавекі і экскаватар з машыністам. Прычына здарэння высвятляецца.
