Моцныя паводкі атакуюць усё новыя тэрыторыі. Чэхія, Германія, Венгрыя, стыхія дабралася і да Польшчы. Вуліцы Варшавы ператварыліся ў сапраўдныя водаканалы. У Германіі здарылася тое, чаго баяліся больш за ўсё - прарвала дамбу. Тысячы людзей эвакуіруюць. У Чэхіі спадзяюцца, што самае горшае ўжо ў мінулым. Аднак супакойвацца рана - сіноптыкі чакаюць новых ліўняў.
Расказвае Лізавета Казакова.
30 літраў воды на квадратны метр за амаль тры гадзіны. Начныя дажджы такой магутнасці ў выніку літаральна паралізавалі Варшаву, адрэзаўшы сталіцу па асноўных кірунках. Сярод штучных каналаў - адна з цэнтральных магістраляў горада - Траса Таруньская. У вадзяную пастку трапілі сама меней 10 аўтамабіляў. З машын людзі выбіраліся ўплаў або залазілі на дахі ў чаканні ратавальнікаў. Былі закрытыя чатыры станцыі падземкі: адміністрацыя спалохалася кароткага замыкання.
Нягледзячы на аптымістычныя прагнозы, рэкордны ўзровень вады не спадае ў басейнах Дуная і Эльбы. Па-ранейшаму ў заторах дарогі Венгрыі.
Жыхары пацярпелых рэгіёнаў Чэхіі спадзяюцца, што самае горшае ўжо ў мінулым. Людзі аднаўляюць сваю маёмасць. Але супакойвацца рана - сіноптыкі чакаюць новых ліўняў, у прыватнасці, на ўсходзе краіны.
Маштабнае бедства перажывае Германія. Напярэдадні прарвала дамбу недалёка ад Магдэбурга. З небяспечных раёнаў давялося эвакуіраваць 23 тысячы чалавек. У горадзе спыненая падача электрычнасці. Вада ў Эльбе набліжаецца да адзнакі 8 метраў. Гэта ў чатыры разы больш, чым звычайна. Трывогі дадаў ананімны ліст з пагрозамі падрыву некалькіх дамб. Улады ўпэўніваюць, што не пакінуць гэта без увагі.
Жыхары пацярпелых краін не здаюцца. Узводзяць 10-метровыя плаціны з мяшкоў з пяском і адпампоўваюць ваду з вуліц і падвалаў. Паводле некаторых звестак, пік паводак у той жа Германіі яшчэ наперадзе. Лік выпрабаванняў на трываласць умацаванняў, што ўзводзяцца, і чалавечага адзінства перад выклікам прыроды ідзе не на дні, а на тыдні.
