У Кыргызстане высвятляюць акалічнасці крушэння грузавога "боінга" адной з турэцкіх авіякампаній. Сёння раніцай ён упаў на жылыя дамы ў наваколлях Бішкека.
Грузавы самалёт ляцеў з Ганконга ў Стамбул і павінен быў дазаправіцца ў кыргызскім аэрапорце "Манас". Але лайнер, які спрабаваў двойчы зайсці на пасадку, пашкодзіў стужку пасадачна-сігнальных агнёў на ўзлётнай паласе, зачапіў побач з ёй дрэвы, будынак аэранавігацыі і ўпаў на дачны пасёлак. Разбураныя больш як 30 дамоў. Паводле апошніх даных МНС, загінулі 13 дзяцей і 19 дарослых. 15 пацярпелых - палова з іх дзеці - з цяжкімі траўмамі шпіталізаваныя. Прычыны крушэння высвятляюцца - версій некалькі. Гэта і тэхнічныя праблемы, і дрэнныя метэаўмовы, і памылка пілотаў.
Кубатбек Баронаў, міністр надзвычайных сітуацый Кыргызстана: "Пакуль прычына невядомая. Навігацыя перадае інфармацыю аб тым, што бачнасць была ў межах дапушчальнага - 325 метраў".
Паводле апошняй інфармацыі, адна з чорных скрынь ужо знойдзена. Пошукі яшчэ двух бартавых самапісцаў прадаўжаюцца. Генпракуратура Кыргызстана па факце крушэння самалёта ўзбудзіла крымінальную справу. У расследаванні павінен дапамагчы міжнародны авіяцыйны камітэт. 17 студзеня ў Кыргызстане абвешчана днём жалобы. Прэзідэнт Беларусі Аляксандр Лукашэнка выказаў спачуванне прэзідэнту Кыргызстана Алмазбеку Атамбаеву, родным і блізкім загінуўшых.
