Да старту галоўнай сусветнай і спартыўнай падзеі - зімовых Алімпійскіх гульняў у Паўднёвай Карэі - засталося 69 гадзін, ужо крыху менш. У прадчуванні і спартсмены, і балельшчыкі. Безумоўна, гэтую Алімпіяду яшчэ да старту можна лічыць самай прынцыповай па напале пачуццяў. Ды ўсё ж галоўныя спартыўныя інтрыгі яшчэ наперадзе. У Пхёнчхане працуе і здымачная група Агенцтва тэленавін. Першымі ў алімпійскую вёску засяліліся нашы біятланісты. Яны ўжо правялі прыстрэлку і да трасы, і да ўмоў надвор’я. Усё закуліссе Алімпійскіх гульняў, эксклюзіўныя кадры і каментарыі - у вялікім сюжэце Мікалая Стулы.
Дар'я Домрачава забягае ў адміністрацыйны будынак біятлоннага комплексу. Няспешных прагулак зараз у Пхёнчхане дазволіць сабе нельга. На сцяне вісіць прагноз надвор'я, які не пакідае выбару: абяцаюць маразы ніжэй за мінус 20 у ночы. За Домрачавай і іншыя беларускі: ад абмаражэння заляпілі ўдзельнікі твары пластырам. Надзея Пісарава нават гуляецца з ружовымі сэрцайкамі.
У сталіцы Алімпіяды часавая розніца з Мінскам шэсць гадзін. Але беларускія біятланісткі вырашылі не перайначвацца.
Паўднёвая Карэя на тое і Далёкі Усход, што адаптавацца да яе так няпроста. Клімат, ежа, розніца часавых паясоў патрабуе адаптацыі. Трэнеры радуюць: дзяўчаты выходзяць на аптымальныя кандыцыі і ўжо выконваюць нагрузкі ў поўным аб'ёме.
Снежная гармата прыводзіць у парадак біятлонны стадыён - надае яму эстэтычна прымальны выгляд да суботы. Ужо вядомы і склад нашай каманды на гэты дзень. Домрачава, Скардзіна, Крыўко і Пісарава. Трэнеры не хаваюць: Надзея Пісарава плануецца чацвёртым нумарам і ў эстафету.
Цана кожнага стрэлу ў суботу будзе вельмі высокая - усяго два агнявыя рубяжы, памылку выправіць за кошт ходу па дыстанцыі будзе складана. Тым больш ёсць верагоднасць, што вецер можа ператварыць алімпійскія спаборніцтвы ў латарэю.
З марозам і ветрам будуць змагацца на цырымоніі адкрыцця Гульняў і арганізатары. Не меней за пяць гадзін на адкрытым паветры правядуць тыя, хто будзе ў ёй удзельнічаць. Гарбата, коўдры, ветраахова - так будуць ратавацца ад холаду. Дарэчы, вядома, што біятланісткі ў гэты вечар застануцца ў вёсцы - іх вырашылі пашкадаваць.
Перад пачаткам Алімпіяды самай рэзананснай навіной застаецца недапушчэнне нават чыстых расійскіх атлетаў, якіх МАК проста не запрасіў у Паўднёвую Карэю. А пасля апраўдання нашых усходніх суседзяў у Арбітражным судзе ў Лазане дагэтуль няясны канчатковы спіс дэлегацыі алімпійскіх спартсменаў з Расіі. На цырымоніі адкрыцця яны, як вядома, пойдуць пад нейтральным флагам. Дарэчы, МАК ужо аб'явіў, што не трэба шукаць сцяганосца: белае палотнішча з пяццю кольцамі панясе спецыяльна прызначаны аргкамітэтам валанцёр. І наогул, арганізатары Гульняў вельмі незадаволеныя рашэннем КАС.
Алімпійскую вёску да заўтрашняга дня могуць вольна наведваць толькі атлеты і трэнеры. Даведацца, як яны там абжываюцца, для журналістаў тая яшчэ задача, але калі атрымліваецца, выходзіць эксклюзіў. І высокі плот гэтаму не перашкода. Пра карэйскую гасціннасць з першых вуснаў спецыяльна для Агенцтва тэленавін распавядае Сяргей Далідовіч.
Беларусы засяліліся ў алімпійскія вёскі пакуль не ў поўным складзе. 8 лютага з Японіі прыляцяць фрыстайлісты, у гэты ж дзень заселіцца і гарналыжніца Марыя Шканава. Томас Бах у алімпійскую вёску прыходзіць не госцем. На 15-м паверсе аднаго з гмахаў за ім замацаваны пакой.
Таму кіраўніка МАК можна сустрэць у вёсцы і спытаць, чым сёння кормяць у сталовай. Або пацікавіцца, колькі праехаў на велатрэнажоры? Нароўні з усімі ў алімпійскай вёсцы і спартсмены з Паўночнай Карэі. У суседзяў на паўвостраве пацяплелі адносіны, праўда, дэлегацыя з поўначы па звычцы трымаецца скавана нават у сталовай.
Паўднёвая Карэя - тэхналагічна вельмі развітая краіна. Гэта адчуваецца на кожным кроку. Віртуальны спорт даступны ўсім. Выпрабаваць на сабе, што адчувае гарналыжнік, які нясецца на неверагодных хуткасцях, можна за ўмераную плату. А вось гэтае дзейства завецца фіш айс хакей. Настольная гульня ў акварыуме, дзе рыбы ганяюць шайбу.
Лазерны сэнсар сочыць за рухам рыб-робатаў і праецыюе выяву шайбы на ваду. Кіраванне рыбамі праз джойсцік. Ствараецца сімбіёз віртуальнасці і рэальнасці. Ідэя гульні нарадзілася ў Канадзе, а выкананне выключна карэйскае. Папулярнасць гульні проста вялізарная.
Навінку прыехалі здымаць нават японцы, якія пра сучасныя тэхналогіі ведаюць вельмі многа. Тут жа адбыўся і таварыскі матч Беларусь - Японія.
Японка прадказальна выбрала вобраз залатой рыбкі. Прыйшлося гуляць чорнымі і на хаду разбірацца ў правілах. Баявая нічыя 3:3, затым пасляматчавыя каментарыі ва флешзоне. Усё, як у вялікім спорце, які захопіць балельшчыка праз два дні.
