Гонкамі праследавання ў Ханты-Мансійску сёння прадоўжыцца другі этап Кубка Расіі па біятлоне. Менш чым гадзіна застаецца да старту мужчынскага пасьюта, дзе ў топ-10 - адразу чатыры беларусы.
Капітан нашай каманды - Антон Смольскі - напярэдадні ўзяў бронзу ў спрынце і сыдзе на дыстанцыю ўсяго праз 9 секунд пасля Эдуарда Латыпава. Яшчэ сочым за Дзмітрыем Лазоўскім, Іванам Тулаціным і Максімам Вараб'ём. Яны таксама маюць магчымасць пазмагацца за п'едэстал - пачатак у 10:00.
А ў 13:00 на лыжню выйдуць жанчыны. Тут увага беларускіх прыхільнікаў будзе прыкавана да выступлення Ганны Солы. Яна стартуе адзінаццатай, праз 44 секунды пасля лідара Наталлі Шаўчэнкі.
Абедзве гонкі ў прамым эфіры пакажа тэлеканал "Беларусь 5".
