Пасля сезоннага водпуску дзверы расчыніў крыты каток.
Расказвае Дзмітрый Лукша.
Гэтыя хлопцы сапраўдныя ўладары лядовых баталій. Яны носяць ганарлівы тытул спартсменаў-прафесіяналаў. І прадстаўляюць юнацкую зборную Беларусі па фігурным катанні. Так, яны майстры сваёй справы, і ўсё іх жыццё праходзіць у цесным звязку з лёдам. Тым не менш, таксама горача і натхнёна яны кожны год чакаюць гэтую падзею. Адкрыццё зімовага сезона. Чаму ж лёду надаецца такая асаблівая ўвага? Адказ на гэтае пытанне зможа знайсці кожны, хто вырашыцца зняць з цвіка пару канькоў і праедзе па беласнежнай роўнядзі. Паверыць на слова складана, гэты момант трэба проста прачуць.
Адкрываць зімовы сезон сёлета вырашылі з размахам. Ледзь ці не з самай раніцы гасцей цэнтра сустракалі артысты. І зноў, як у казцы, яны прапаноўвалі не праходзіць міма, а зазірнуць у гэты імправізаваны лядовы замак. Вядома, больш за іншых такое відовішча радавала маленькіх фігурыстаў. Бо менавіта яны - галоўныя гледачы і ўдзельнікі кожнага зімовага шоу. Павітаць дарагую публіку і адначасова перарэзаць пунсовую стужачку выйшла сама Снежная Каралева. Праўда, у адрозненне ад усіх вядомага твора яна адтала і падарыла сапраўдны лядовы баль.
Дзмітрый Алешка, намеснік дырэктара РГЦ Сілічы: Каток карыстаецца даволі добрым попытам. Асабліва ў выхадныя дні людзі прыязджаюць цэлымі сем'ямі з Мінска, Лагойска, Лагойскага раёна. І я думаю, што з гэтага мерапрыемства пачнецца новы сезон 2014 - 2015 у нашым гарналыжным комплексе.
Тыя ж, хто сёння не змог нацешыцца лядовай эйфарыяй, яшчэ паспеюць гэта зрабіць. Каток ў Сілічах чакае сваіх заваёўнікаў. Тым больш што часу і месца для гэтага звышдастаткова. Пляцоўка кожны дзень гатовая прымаць да трохсот наведвальнікаў.
Вось такое адкрыццё зімовага сезона - гэта добры і ёмісты адказ сумным восеньскім вечарам. Бо што можа быць лепш за тое, як правесці час з карысцю і весялосцю тут, на катку. Застаецца толькі знайсці ў сабе сілы падняцца з канапы і прыехаць сюды. Эмоцыі відавочна будуць забяспечаныя.
