Шматлюдна было і ў Мінску на пляцоўцы каля Палаца спорту. Там жыхары і госці сталіцы спрабавалі свае сілы ў розных відах спорту. А кульмінацыяй стала цырымонія праводзінаў беларускіх атлетаў на першыя Еўрапейскія гульні, якія ўжо на наступным тыдні стартуюць у Азербайджане. Белтэлерадыёкампанія будзе весці прамыя трансляцыі з Баку. Сачыце за праграмамі тэлеканалаў "Беларусь 1", "Беларусь 5" і "Беларусь 2". Падзеі сённяшняга алімпійскага дня ў рэпартажы Паўла Капуцкага.
Няма лепшага прыкладу за асабісты. Максім Рыжанкоў пачаў алімпійскі дзень з прабежкі на два з паловай кіламетры. Першы віцэ-прэзідэнт Нацыянальнага алімпійскага камітэта прызнаецца: каб быць у форме, ён кожны дзень дае арганізму фізічную нагрузку.
Максім Рыжанкоў, першы віцэ-прэзідэнт НАК Беларусі: "Мы прапанавалі дзесяці федэрацыям, у тым ліку і Федэрацыі баскетбола. Не маглі яны адмовіць нам паказаць свае віды спорту, каб людзі бачылі, каб сваіх дзяцей аддалі, можа быць. Дзесьці атрымалі майку, кепку алімпійскага дня".
Перамог наймацнейшы, але ў выйгрышы засталіся ўсе. Інакш не бывае, калі гутарка пра фізкультуру, а не пра вялікі спорт. Хоць некаторыя ўдзельнікі алімпійскага дня паказвалі зусім не аматарскія вынікі.
Вядомы беларускі паўэрліфтар і стронгмен Аляксандр Курак па мянушцы Салігорскі мядзведзь адной правай некалькі разоў падняў стакілаграмовую гантэль.
Калі сцэну пакінулі артысты, на яе ўзышлі спартсмены. Беларусь на першых Еўрапейскіх гульнях у Баку будзе прадстаўляць 151 атлет, разам з імі ў сталіцу Азербайджана адправяцца 53 трэнеры.
Максім Рыжанкоў, першы віцэ-прэзідэнт НАК Беларусі: "Мы гаварылі з усімі спартсменамі, трэнерскім штабам. Створаныя ўсе неабходныя ўмовы для падрыхтоўкі. Фармакалагічнае забеспячэнне, навучальна-трэніровачныя зборы. Экіпіроўка, вы самі бачылі, якая".
Дзяўчаты з жаночай каманды па акрабатыцы свой камплект формы атрымалі нядаўна і засталіся вельмі задаволеныя і колькасцю рэчаў, і дызайнам, і выгодай.
Зараз у Баку членаў нашай дэлегацыі будуць пазнаваць менавіта па гэтай форме з надпісам "Беларусь" і сімволікай краіны.
Беларускія спартсмены не проста актыўна рыхтаваліся да Еўрапейскіх гульняў, вытворца формы той жа, што на Гульні ў Сочы-2014. Так што будзем спадзявацца, што ў Баку ў нас усё атрымаецца гэтак жа ўдала.
Шэсць тысяч удзельнікаў разыграюць 253 камплекты медалёў у 20 відах спорту. Азербайджанскія Гульні стартуюць ужо ў пятніцу і падоўжацца два з паловай тыдні.
