Сёння агонь яркіх перамог пабывае на галоўных прамысловых прадпрыемствах Мінска

Да старту II Еўрапейскіх гульняў два дні. Падрыхтоўка да маштабнай падзеі на фінішнай прамой. Балельшчыкі, атлеты, замежныя спецыялісты актыўна прыбываюць у нашу краіну. А "Полымя міру" працягвае свой маршрут ужо ў сталіцы. 

Напярэдадні эстафета злучыла Нацыянальную бібліятэку і Кастрычніцкую плошчу. Маршрут працягласцю 12 кіламетраў пераадолелі паўсотні факеланосцаў. Гэта артысты эстрады, вядомыя акцёры, вядучыя. Сярод іх і легенды сусветнага спорту - алімпійская чэмпіёнка па гімнастыцы Антаніна Кошаль і алімпійскі чэмпіён па біятлоне Аляксандр Ціханаў. 

Эстафету падхапілі і ў Белтэлерадыёкампаніі. У руках вядучых "Галоўнага эфіру"  полымя азарыла студыю "600 метраў". А ўжо сёння агонь яркіх перамог прыбудзе на галоўныя прамысловыя прадпрыемствы сталіцы. Гэта флагманы машынабудавання МТЗ і МАЗ, а таксама Парк высокіх тэхналогій. Усе падрабязнасці палымянага прабегу  сёння апоўдні.