Зборная Беларусі па футболе пачынае адборачную кампанію на Еўра-2020

На дзве пуцёўкі ад нашай кваліфікацыйнай групы прэтэндуюць 5 каманд. Сярод іх - два прызнаныя гранды - Германія і Нідэрланды. З апошнімі як раз і згуляе сёння каманда Ігара Крывушэнкі. Пачатак матча - у 22:45, яго пакажа тэлеканал "Беларусь 5". Разам з камандай у Галандыі знаходзіцца і наш карэспандэнт Яўген Табула.

Пяць гадоў запар газон стадыёна ў Ратэрдаме прызнаецца лепшым у Галандыі - упэўніваў нас мясцовы работнік. Менавіта таму футбалісты "аранжавай зборнай" заўсёды просяць федэрацыю гуляць не ў Амстэрдаме або Эйндховене, а менавіта на "Дэ Куйпе" - стадыёне "Фейнорда". Беларуская каманда ў Ратэрдам прыляцела ў аўторак. 

Учора ўвечары адбылася трэніроўка, а таксама прэс-канферэнцыя, дзе кампанію галоўнаму трэнеру Ігару Крывушэнку склаў адзін з самых дасведчаных гульцоў зборнай - Сяргей Кісляк. Для яго гэтая гульня можа стаць 70-й у футболцы нацыянальнай каманды. Мясцовых журналістаў было няшмат, ім больш значна цікава было паслухаць Рональда Кумана. Але тыя, хто ўсё ж застаўся на прэс-канферэнцыю беларусаў, задавалі пытанні аб Лізе нацый і аб тым, ці ёсць у нашай каманды свой стыль гульні.

У нас таксама ёсць стыль гульні. Мы заўсёды спрабуем гуляць у пас, ствараць пабольш галявых момантаў. Зразумела, што Галандыя фаварыт. Мы можам арганізаванасцю і самааддачай зарабіць ачкі ў гульні.

Ігар Крывушэнка гаварыў, што практычна вызначыўся са складам. Заставалася зрабіць выбар на тры пазіцыі. На якія - раскрываць у эксклюзіўных зносінах не стаў. Толькі дадаў, што справа ў сферы медыцыны. Хто будзе лепш выглядаць фізічна, той і згуляе. Традыцыйна цікава, ці выйдзе са старту Аляксандр Глеб. Хутка склады будуць аб'яўленыя афіцыйна, але я ўжо ведаю, што Глеб у аснове. У варотах згуляе Андрэй Гарбуноў, у атацы Антон Сарока. 

Што ж да зборнай Галандыі, то зараз гэта вельмі магутная каманда. Так, яны не прайшлі кваліфікацыю на два папярэднія топ-турніры. Іх не было ў Францыі на чэмпіянаце Еўропы і ў Расіі на чэмпіянаце свету. Справа ў змене пакаленняў. І зараз здаецца, што Галандыя вяртаецца на былы ўзровень. Усе ж памятаюць, як "Аякс" выбіў "Рэал" з Лігі чэмпіёнаў. Ды і чаго вартая перамога ў групе Лігі нацый, дзе сапернікамі "аранжавых" былі зборныя Германіі і Францыі. Так што, як і ў Беларусі, у Галандыі будзе магчымасць трапіць на чэмпіянат Еўропы - 2020, нават калі асноўны адбор раптам апынецца няўдалым. 

Што ж да статыстыкі ўзаемаадносін, то ў Галандыі 6 перамог, у Беларусі - 2, і тыя матчы ў нашай краіне ўспамінаць вельмі любяць. Праўда, яшчэ ні разу беларуская зборная не брала ачкі ў Галандыі. Верым, гэтая серыя спыніцца, хай і будзе вельмі складана.