Усяго чатыры дні - і 2015-ы стане гісторыяй. Што тычыцца спартыўнай часткі, то год безумоўна можна назваць паспяховым. Вялікі хрустальны глобус Дар'і Домрачавай, выдатнае выступленне зборнай па хакеі, удзел у Еўракубках БАТЭ і сталічнага “Дынама”. Нарэшце, трыумф мінчанкі Марыны Арзамасавай на чэмпіянаце свету. Самыя значныя падзеі года ў рубрыцы "Матчбол".
Расказвае Станіслаў Ліпскі. Пасля выдатнай Алімпіяды ў Сочы, дзе Дар’я Домрачава стала трохразовай чэмпіёнкай, здавалася, у наступным сезоне акрамя беларускі ніхто больш не павінен і нават не здольны заваяваць Вялікі хрустальны глобус. Аднак фінка Кайса Мякярайнен мела свой пункт гледжання на гэтае пытанне.
Пасля трох этапаў Кубка свету адрыў фінскай спартсменкі ад нашай Дар'і складаў сур'ёзныя 119 балаў. Аднак, каб аднавіць раўнавагу, у беларускі наперадзе былі яшчэ сем этапаў: якраз у іх, атрымаўшы сем бліскучых перамог, Домрачава здолела дагнаць, а затым і перагнаць Кайсу Мякярайнен і атрымаць такім чынам самы прэстыжны трафей у біятлоне.
Вясну запомнім па выдатным выступленні зборнай Беларусі па хакеі на чэмпіянаце свету: па-першае, атрымалі гістарычную вікторыю над камандай Злучаных Штатаў Амерыкі, па-другое, выйшлі ў чвэрцьфінал турніру, дзе ў нас, на жаль, не было шанцаў у паядынку супраць Канады. 0:9 мы прайгралі. Аднак новы настаўнік зборнай Дэйв Льюіс заваяваў сімпатыі аматараў хакея.
Як гром сярод яснага неба ў апошні месяц лета прагучала навіна аб затрыманні топ-менеджараў сталічнага хакейнага “Дынама” Максіма Суботкіна і Уладзіміра Беражкова. Іх абвінавацілі ў злоўжыванні службовымі паўнамоцтвамі і крадзяжы сродкаў. Аднак жнівень скончыўся на мажорнай ноце: першае золата ў бегавых дысцыплінах з часоў Несцярэнкі на чэмпіянаце свету заваявала мінчанка Марына Арзамасава ў бегу на 800 метраў.
Восень прайшла ў антуражы футбольных баталій: БАТЭ зноў прымусіў Еўропу паважаць сабе. На “Барысаў-Арэне” жоўта-сінія атрымалі перамогу над “Ромай” 3:2 і да апошняга тура групавога этапа Лігі чэмпіёнаў каманда з’яўлялася прэтэндэнтам на выхад у плэй-оф, аднак крыху не хапіла. Нягледзячы на гэта менавіта Аляксандра Ермаковіча прызналі лепшым трэнерам года, а футбалістам - Ігара Стасевіча. БАТЭ, зразумела, лепшая каманда!
Год 2016-ы - алімпійскі. Таму адназначна ён будзе не менш яркім на перамогі. Галоўны старт чатырохгоддзя пройдзе ў жніўні ў Бразіліі - львіная доля ліцэнзій яшчэ ў розыгрышы, таму ў нас няма выбару як толькі пачынаць падтрымліваць беларускіх атлетаў ужо зараз.
