Праект "Зборная Беларусі". Нацыянальная каманда па веславанні на байдарках і каноэ

Самы час прадставіць галоўных герояў II Еўрапейскіх гульняў - нашых спартсменаў, якім выпала адказная місія выступаць на роднай зямлі. Сёння мы распавядзём пра каманду, якая цалкам можа стаць лакаматывам. Яны ніколі не вярталіся без узнагарод з буйных сусветных стартаў, а зараз рыхтуюцца перамагаць і ў Мінску. У чэрвені на вяслярным канале ў Заслаўі разыграюць 16 камплектаў узнагарод. Білеты яшчэ ў продажы,  так што  магчымасць убачыць выступленне нашых спартсменаў яшчэ ёсць. Хто ж яны, фаварыты будучых стартаў? Сёння ў рамках праекта "Зборная Беларусі" Агенцтва тэленавін сумесна з партнёрам БПС-Ашчадбанкам прадстаўляюць нацыянальную каманду па веславанні на байдарках і каноэ. 

У байдарках спартсмены спаборнічаюць седзячы, у каноэ вяслуюць, стоячы на калене. Магчыма, вы не ведалі, але байдаркай спартсмены кіруюць у тым ліку і пры дапамозе ног. 

Гэтаму судну 12 гадоў. Апроч прозвішчаў весляроў, тут па аналогіі з зорачкамі на фюзеляжы самалёта адзначаны і пераможныя спаборніцтвы.

Веславанне на байдарках і каноэ  - самы паспяховы від спорту з алімпійскай праграмы ў суверэннай Беларусі. Вось ужо 18 гадоў нацыянальнай камандай кіруе Уладзімір Шантаровіч. Кіраваць байдаркамі і каноэ -  гэта не значыць глядзець удалячынь з катара. Уладзімір Уладзіміравіч памятае колькасць грабкоў сваіх спартсменаў на кожнай трэніроўцы. У крайнім выпадку, у яго заўсёды ўсё запісана, можна паглядзець і вызначыць пункты росту на наступны занятак.

Каманда, якую глядач убачыць на Еўрапейскіх гульнях,  - лепшыя ў краіне хлопцы і дзяўчаты. Вытрымаць страшэнныя нагрузкі веславання далёка не кожнаму пад сілу, а каб у працэсе падрыхтоўкі адсеў быў мінімальны, неабходна прымяняць новыя тэхналогіі пры селекцыі. Аб сваіх напрацоўках Шантаровіч можа гаварыць гадзінамі, але робіць акцэнт на псіхалагічнай устойлівасці.

Лідар каманды Раман Петрушэнка. Калі скласці рэгаліі ўсёй цяперашняй каманды, хлопцы і дзяўчаты ўсё роўна саступяць мазыраніну, між іншым, маёру міліцыі, які блізкі да завяршэння сваёй бліскучай спартыўнай кар'еры. Толькі алімпійскіх медалёў у Рамана 4. Ён сяміразовы чэмпіён свету, кавалер ордэна Айчыны 2 і 3 ступеняў. У кар'еры застаўся толькі адзін прабел - ні адной значнай узнагароды Петрушэнка яшчэ не выйграваў на радзіме, перад сваімі гледачамі. 

Адважымся назваць байдарачнікаў і канаістаў ударнай сілай беларусаў на Еўрапейскіх гульнях. Атлеты разыграюць 16 камплектаў узнагарод, на кожны будуць прэтэндаваць беларусы. Існуюць лодкі для аднаго ўдзельніка, двух  і чатырох удзельнікаў. Ільвіная доля медалёў будзе разыграна на кароткіх дыстанцыях: 200, 500 і 1000 метраў. Старт на 5 кіламетраў выявіць і самых вынослівых у мужчын і жанчын.

За вынікамі можна назіраць на самім вялікім святлодыёдным табло ў Беларусі - цэлых 66 квадратных метраў. У заяўках каманд чакаецца каля 350 спартсменаў. Для розыгрышу 1 узнагароды ім спатрэбяцца тры дні: з 25 па 27 чэрвеня. Уладзімір Шантаровіч абяцае не менш за 5  медалёў беларускіх весляроў.