Па знакавых месцах Магілёўскага рэгіёна прайшоў агонь ІІ Еўрапейскіх гульняў

Мноства яркіх здымкаў удалося зрабіць і жыхарам Магілёўскага рэгіёна. Па знакавых месцах прайшоў агонь ІІ Еўрапейскіх гульняў. 

Удзельнікі эстафеты ўжо пераадолелі вялікую частку шляху.

Дзе сёння сустракалі “Полымя міру” - ведае Аляксандр Лучонак.

Дарэвалюцыйная архітэктура пачатку мінулага стагоддзя, мемарыялы і старажытныя храмы. Аўтэнтычнасць горада на Бярэзіне сёння надала асаблівы глянец палымянаму маршруту. Прама за маёй спіной адна з галоўных славутасцяў - Бабруйская крэпасць. Ёй больш як 200 гадоў. Падчас вайны 1812 года цытадэль змагла вытрымаць 2-месячную аблогу войскаў Напалеона. Выкарыстоўвалі яе па прызначэнні і падчас Вялікай Айчыннай. Час будынак усё-такі не пашкадаваў. Зараз гэта суцэльныя руіны. Але вярнуць цытадэлі першароднае аблічча ўжо плануецца. У першую чаргу, адновяць назіральны мост і мінскія вароты. 

За маштабным забегам праз гістарычны цэнтр горада сёння назіралі некалькі соцень чалавек. Для жыхароў Бабруйска гэта ўнікальная магчымасць стаць часткай маштабнага свята, зрэшты, як і для факеланосцаў. Першым сімвалічны агонь запаліў Руслан Аляхно. Менавіта тут лаўрэат песні года пачынаў свой творчы шлях. Гэты яркі момант, гаворыць, як у той самой песні - незвычайны. 

Эстафета полымя традыцыйна аб'яднала артыстаў, палітыкаў і спартсменаў, якіх так або інакш звязвае малая радзіма, каля вучылішча, якое стала для іх адпраўным пунктам на вяршыню алімпійскага п'едэстала. Агонь ІІ Еўрапейскіх гульняў пранеслі Аляксандр і Андрэй Багдановічы. Перадача эстафеты прайшла ў прамым сэнсе па-сямейнаму. Але пад чуткім кантролем захавальнікаў агню. 

Далей шлях агню накіраваўся па галоўных вуліцах горада. Факеланосцы прамчалі міма помніка герою "Залатога цяля" Шуры Балаганаву, каля драматычнага тэатра і, вядома ж, аднаго з галоўных сімвалаў Бабруйска.

Сустракалі “Полымя міру” і на бабруйскам Арбаце - гэта вуліца Сацыялістычная. Тут яго пранесла першая савецкая алімпійская чэмпіёнка па мастацкай гімнастыцы Марына Лобач. Вопытны трэнер і па сумяшчальніцтве спартыўны суддзя ацаніла сённяшні прабег вышэйшым балам, дарэчы, таго ж чакае і ад нашай зборнай. 

Фінальным пунктам маршруту стала "Бабруйск-Арэна". Тут для гасцей свята падрыхтавалі сапраўды палымянае шоу. 

Заўтра арганізатары абяцаюць не менш насычаную праграму. “Полымя міру” пераадолее вытворчы маршрут. Удзельнікі эстафеты наведаюць адразу некалькі буйных прадпрыемстваў: гэта сельскагаспадарчы кааператыў, завод па выпуску кандытарскіх вырабаў і па вытворчасці аўтамабільных шын.