Казачна чароўнае і адначасова тэхнічна дасканалае дзейства. Эпітэты, якія суправаджалі ўрачыстую цырымонію адкрыцця XXIII Алімпійскіх гульняў. Назіралі за тым, што адбывалася, 35 тысяч гледачоў на стадыёне і мільёны тэлегледачоў па ўсім свеце. Адкрывала парад Грэцыя, а завяршала аб'яднаная каманда гаспадароў Гульняў -- Карэі. Гэтая Алімпіяда стала першай, у якой флагі неслі выключна спартсмены. У зборнай Беларусі сцяганосцам стала алімпійская чэмпіёнка Ала Цупер. Эстафеце агню арганізатары надалі асаблівую ўвагу. Яе агульная працягласць склала роўна 2018 кіламетраў, а неслі факел 7,5 тысячы факеланосцаў. Як будзе запалены агонь, арганізатары трымалі ў строгім сакрэце. Інтрыга захоўвалася да апошняга моманту. З падрабязнасцямі Вольга Макей.
Паўднёвая Карэя трэці год запар утрымлівае лідарства сярод самых інавацыйных краін, таму яшчэ да цырымоніі адкрыцця было зразумела: Пхёнчхан будзе здзіўляць. Тэхналагічнасць - адзін з пяці пунктаў канцэпцыі Гульняў-2018 (яшчэ экалагічнасць, эканамічнасць, культура і мір.) Гэтую ідэю арганізатары ўвасобілі ў пяцігранным стадыёне. Дарэчы, гэта першы ў гісторыі аб'ект, які пабудавалі толькі для цырымоній адкрыцця і закрыцця. Спаборніцтвы на ім праводзіцца не будуць, а пасля Гульняў арэну часткова разбяруць. Імаверна, з гэтых меркаванняў стадыён не накрывалі дахам. Той выпадак, калі арганізатары ўлічылі ўсё, акрамя галоўнага.
Арганізатарам было і сапраўды не да жартаў: у лістападзе падчас канцэрта на гэтым стадыёне 7 гледачоў атрымалі пераахаладжэнне. Зрэшты, здзіўляцца няма чаму: побач з Пхёнчханам размешчаны самы халодны пункт Паўднёвай Карэі - перавал Тэгвален. Але вечарам метэаралагічная служба паказала ўсяго мінус 3, з ветрам - мінус 9. Нягледзячы на гэта, сцяганосец зборнай Беларусі Ала Цупер апранулася цёпла.
Падрыхтоўкай алімпійскага шоу займалася 400 чалавек, яшчэ 2000 артыстаў непасрэдна задзейнічаныя ў свяце. І гэтая самая маленькая колькасць акцёраў у гісторыі алімпійскіх цырымоній.
Само паданне - гэта зімовая казка, галоўныя героі якой - пяцёра дзяцей з сельскай правінцыі Канвон. Казачная прыгода, вядома, з усходнім каларытам і карэйскімі традыцыямі, (трэба было пазнаёміць гледачоў з мясцовай культурай), але галоўная мэта - данесці ідэі адзінства, міру і аб'яднання розных людзей.
Вядома, цырымонія не абышлася без найноўшых тэхналогій, (упершыню ў свеце тут прэзентавана сетка 5G), але арганізатары робяць упор - у гэтай сучаснасці галоўная роля ўсё ж чалавеку. Дарэчы, і гледачоў задзейнічалі ў цырымоніі, у кожнага традыцыйны карэйскі барабан Сога. 35 тысяч чалавек разам выконваюць Jenga Dance.
Самая доўгая, але доўгачаканая частка цырымоніі адкрыцця - парад спартсменаў. Гэтым разам чарговасць дыктаваў карэйскі алфавіт. Беларусь з'яўляецца на алімпійскім стадыёне пад нумарам 29. І ўпершыню ў гісторыі флаг нашай краіны ў жаночых руках. Сцяганосец - алімпійская чэмпіёнка Ала Цупер.
Наогул, наша каманда - гэта 32 спартсмены: 16 жанчын і 16 мужчын. Вось так, вядома, не спецыяльна ўдалося захаваць гендарную роўнасць, за якую так выступае Міжнародны алімпійскі камітэт. Але па стадыёне прайшлі не ўсе беларускія спартсмены. Цырымонія шматгадзінная, ды яшчэ і на марозе. Таму многія глядзелі яе па тэлевізары. Напрыклад, з біятланістак прыйшла толькі Дзінара Алімбекава. Астатнім ужо заўтра ў спрынце змагацца за медалі.
Упершыню на Гульнях каманда пад назвай "Алімпійскія атлеты з Расіі". За гісторыю было рознае: спартсмены з нейтральным статусам, зборная бежанцаў, але пад алімпійскім флагам каманды на цырымоніі адкрыцця яшчэ не выходзілі. Віной усяму допінгавы скандал і вердыкты і апеляцыі, што цягнуліся да апошняга. Сёння, у дзень адкрыцця Гульняў, Спартыўны арбітражны суд паставіў тоўстую кропку, пазбавіўшы 47 спартсменаў апошняга шанцу прыехаць у Карэю. Гісторыя доўгая, але яе вынік такі: запрашэнні на Алімпіяду атрымалі толькі 168 спартсменаў з Расіі. Пры гэтым ніводнаму з іх аргкамітэт не даручыў стаць флаганосцам і прызначыў на гэтую ролю валанцёра.
Зрэшты, калі на цырымонію адкрыцця глядзець шырэй, то яе геапалітычная каштоўнасць для некаторых краін, магчыма, нават больш важная за спартыўную. Размова пра Паўночную і Паўднёвую Карэі. Дзве дзяржавы, падзеленыя доўгім канфліктам, упершыню з 2006 года пад адным флагам. Для жыхароў паўвострава, які хоць і ненадоўга, але стаў адзіным, гэта, бадай, самы доўгачаканы момант.
Дарэчы, Пхёнчхан у перакладзе з карэйскай мовы "мір і росквіт". Гэтыя тэмы прагучалі і ў выступленнях афіцыйных асоб. Вядома, самая доўгачаканая частка адкрыцця Гульняў - цырымонія запальвання агню. Доўгая інтрыга, імя факеланосца да апошняга не ведалі нават каментатары трансляцый. Гэта права даручылі алімпійскай чэмпіёнцы Кім Ён А.
Якімі будуць найбліжэйшыя 17 дзён (менавіта столькі будзе доўжыцца Алімпіяда), спрагназаваць цяжка. Але ўжо зразумела, што яны ўвойдуць у гісторыю для кожнага па-свойму. Дарэчы, госці Алімпіяды стануць удзельнікамі не толькі спартыўнага свята. У разгар зімовых Гульняў 16 лютага настане Новы год па месяцавым календары. У Карэі гэта адно з самых маштабных святаў.
