Унікальны матч для беларускага хакея! Такога не было даўно! Літаральна праз паўгадзіны мінскае "Дынама" згуляе на хатнім лёдзе супраць зборнай клубаў Экстралігі. Яе прадставяць хакеісты сталічнага "Юнацтва", гродзенскага "Нёмана" і салігорскага "Шахцёра" - тройка лідараў чэмпіянату краіны.
На прамую сувязь з "Мінск-Арэны" выходзіць наш карэспандэнт Крысціна Камыш.
Здавалася б, з хакеем на "Мінск-Арэне" ўжо развіталіся як балельшчыкі, арганізатары, так і журналісты. Але сезон для ўсіх працягваецца. Што датычыцца трыбун, то яны пакуль не запоўненыя. Вопыт гаворыць, што гледачы займаюць свае месцы дзесьці за 5-10 хвілін да пачатку матча.
Аднак цікавасць у фанатаў, вядома, ёсць. Гэтаму спрыяе і бясплатны ўваход, і ўнікальнасць паядынку. Справа ў тым, што мінскае "Дынама" апошні раз гуляла супраць зборнай клубаў Экстралігі ў жніўні 2014 года ў Кубку Руслана Салея. Тады мінчане, дарэчы, перамаглі.
З "Юнацтвам" "зубры" перасякаліся тройчы. Тройчы ўступілі. Апошні раз на Кубку Мінска ў ліпені 2017 года. Раблю акцэнт на "Юнацтва", бо менавіта "сталічныя мядзведзі" складаюць аснову зборнай клубаў Экстралігі.
Мяркуйце самі: 23 гульцы ў заяўцы. Двое з салігорскага "Шахцёра", шасцёра з гродзенскага "Нёмана". Трэнерскі штаб прадставяць коўчы "Юнацтва" на чале з Міхаілам Захаравым. Нам удалося пабываць на раскатцы каманды. Хакеісты да матча гатовыя.
У мінскага "Дынама" ўсё не так вясёлкава. "Зубры" ў мінулую пятніцу матчам з "Ёкерытам" завяршылі 11-ты рэгулярны сезон КХЛ. "Бела-сінія" ў зводнай табліцы чэмпіянату размясціліся на перадапошнім месцы. "Мінчане" маглі б быць вышэй, калі б не шэраг траўм. Ростэр "Дынама" па стане на панядзелак налічваў 13 хакеістаў, двое з якіх - варатары. У лазарэце лічыцца адразу 14 гульцоў. Адзначым, паядынак "Дынама" і зборнай клубаў Экстралігі рассудзіць маскоўская брыгада арбітраў КХЛ. На афіцыйным сайце Беларускай федэрацыі хакея адзначаецца, што "спартыўны вынік гэтых паядынкаў будзе мець высокае значэнне".
Супрацьстаянне мінскага "Дынама" і зборнай клубаў Экстралігі прадоўжыцца да дзвюх перамог адной з каманд. У чацвер серыя пераедзе на "Чыжоўка-Арэну". Прамая трансляцыя гульні на тэлеканале "Беларусь 5".