Вялікі хакей гэтымі днямі ў цэнтры ўвагі ўсёй краіны. Зараз у КХЛ - самы гарачы і адказны час - плэй-оф Кубка Гагарына. Напярэдадні сталічнае "Дынама" на "Мінск-Арэне" прымала маскоўскіх аднаклубнікаў у трэцім паядынку 1/8 фіналу.
"Зубрам" было вельмі важна перамагчы, і "бела-сінія" гэта зрабілі пры аншлагу на трыбунах. Падрабязнасці ў Крысціны Камыш.
Кантынентальную хакейную лігу любяць у сталіцы Беларусі. Так, больш як 12 тысяч гледачоў у сярэднім назіралі за хатнімі матчамі мінскага "Дынама" з трыбун. Але гэта было ў рэгулярным сезоне, а плэй-оф Кубка Гагарына - гэта цалкам іншая гісторыя. Дык вось! Як толькі квіткі на паядынкі супраць маскоўскага "Дынама" паступілі ў продаж, фанаты "бела-сініх" "абрынулі" сайт білетнага аператара, і ніхто не сумняваўся ў аншлагу на "Мінск-Арэне".
Усё ўчора на стадыёне было выдатна: і падтрымка фан-сектара, і радасць балельшчыкаў, і эмоцыі дзяцей, і спецэфекты. "Хвалю" трыбуны таксама запускалі і неафіцыйны гімн "Дынама-Мінск" спявалі.
Чамусьці менавіта ў гэтым сезоне публіцы так палюбілася песня Юрыя Шатунова "Сівая ноч". Каб яна загучала на арэне, трэба выканаць толькі адну ўмову - усім разам перамагчы! І ў перапынках супрацьстаяння ніхто з гледачоў не сумняваўся ў беларускім поспеху. Хоць букмекеры, напрыклад, перавагу аддавалі гасцям. Бо сёлета ў "дынамаўскім" дэрбі менавіта Масква нязменна была мацнейшай.
"Крок за крокам". Балельшчык Андрэй Лушчык у дакладнасці перадаў устаноўку клуба на накаўт-раўнд. Яе можна прачытаць нават на футболках хакеістаў.
Дарэчы, звярніце ўвагу! Перад плэй-оф у каманднай зоне арэны трохі абнавіўся інтэр'ер. Зараз у "бела-сініх" ёсць дадатковая матывацыя.
А зараз усё ж сканцэнтруемся на хакейнай сутнасці. Ужо на пятай хвіліне кісцевым кідком лік адкрыў Раман Гарбуноў. Нік Мерклі ў другой траціне павялічыў адрыў. Пасля ў заключным перыядзе канадскі легіянер аформіў дубль. Нельга не адзначыць фенаменальную гульню Аляксея Коласава на апошняй мяжы. Галкіпер штораз выбаўляў дружыну. Толькі аднойчы "дынамаўцы маскоўскія" засмуцілі нашага вартавога варот. Цікаўна, што гэты гол забіў былы "зубр" - Седрык Пакет. Вынік - 3:1.
Такім чынам, мінскае "Дынама" вяртаецца ў серыю да чатырох перамог. Пакуль "масквічы" лідзіруюць у супрацьстаянні - 2:1. Але верым, што гэта толькі на гэты момант.
Наступны матч "дынамаўскага дэрбі" ўжо ў пятніцу. І вялікая каманда арганізатараў гатовая зноў здзіўляць гледачоў.
8 марта хакей стартуе на "Мінск-Арэне" ў 17:00.
