Дзмітрый Асанаў паспрачаецца за золата з Габілам Мамедавым

Дзмітрый Асанаў як мінімум сярэбраны прызёр турніру па боксе. Прычым не толькі Еўрапейскіх гульняў, але і чэмпіянату Еўропы.

Спаборніцтвы ў сталічным палацы спорту "Уручча" носяць таксама статус кантынентальнага форуму. Таму на рынгу атлеты атрымліваюць адразу па два медалі. У паўфінале вагавай катэгорыі да 60 кілаграмаў адзін з лідараў каманды ўзяў верх над прадстаўніком Арменіі Карэнам Танаканянам. За золата Асанаў паспрачаецца з расіянінам Мамедавым - сярэбраным прызёрам мінулага чэмпіянату Еўропы. Дарэчы, у баксёра з Маладзечна за час выступленняў з'явілася свая група фанатаў. Яна, зразумела, у гэтыя дні таксама падтрымлівае Дзмітрыя ў комплексе "Уручча". 

Сёння ўвечары за выхад у фінал у вагавай катэгорыі да 91 кілаграма пазмагаецца яшчэ адзін наш баксёр - Уладзіслаў Смяглікаў. Яго сапернік брытанец - Чыў Кларке. Паўфінальны бой запланаваны на 10 вечара. Адзначым, што па-за залежнасцю ад зыходу гэтага бою беларус гарантаваў сабе бронзавы медаль.