Запомніцца гэты дзень яшчэ і неардынарным, а, больш дакладна сказаць, высакародным учынкам нашай трохразовай алімпійскай чэмпіёнкі. Сусветныя СМІ ўжо ахрысцілі яго біятлонны Fair Play Домрачавай - так сказаць, сумленная барацьба. Наша спартсменка на фінішы гонкі праследавання ў італьянскім Антхольцы выпадкова наступіла на палку суперніцы Даратэі Вірэр і… не стала абганяць, даўшы ёй магчымасць заняць другое месца. У выніку беларуска атрымала бронзу і ўсеагульнае прызнанне і павагу, што, бадай, бясцэнна.
"Дзякуй за сумленнасць і высакароднасць, такія ўчынкі здольныя здзейсніць толькі моцныя спартсмены", - напішуць прыхільнікі ў сацыяльных сетках. Але аб усім па парадку. Вынікі з Антхольца - у Алены Гарэльчык.
Чацвёртая пазіцыя пасля спрынту і адставанне ад чэшкі Веранікі Віткавай, якая стартуе ў пасьюце, усяго ў дзве секунды. У тым, што менавіта сёння Дар'я Домрачава выйграе чарговы медаль этапаў Кубка свету, мала хто сумняваўся. Першыя хвіліны гонкі даказалі гэты факт нават самым заўзятым скептыкам.
У першую тройку Домрачава ўварвалася адразу. Пасля дакладнай стральбы ўжо ішла лідарам. Штрафны круг на першай стойцы адыграла па хуткасці, закрыла ўсе мішэні на трэцяй стральбе, на чацвёртую Дальмаер, Домрачава і Экхаф прыйшлі разам.
Немка была бездакорная, нарвежка прамазала двойчы, Дар'я сышла на штрафны круг, а, выходзячы з яго, захапіла Даратэю Вірэр. І пачалася барацьба за срэбра, Дальмаер паспела забяспечыць сабе практычна перавагу. Беларуска і італьянка ішлі ў сантыметрах адна ад адной. Балельшчыкі ўжо ўяўлялі смачную развязку, можа, нават фотафініш. Але за 50 метраў да фінішу здарылася тое, што пасля назавуць учынкам года.
У барацьбе за срэбра беларуска неспадзявана наступіла на палку Вірэр, італьянка яе губляе і адчайна спрабуе дапамагчы сабе ўжо пустой рукой. Домрачава практычна спыняецца і дазваляе суперніцы перасячы фінішную рысу наперадзе. Сама ж выйграла бронзу - свой 74 медаль этапаў Кубка свету. Аб тым, што заахвоціла трохразовую алімпійскую чэмпіёнку, уладальніцу звання Героя Беларусі, паступіць менавіта так, яна распавяла ў інтэрв'ю "Беларусь 1".
Прыгожы, а галоўнае - высакародны жэст, запомняць надоўга. Адразу ж пасля заканчэння гонкі словы захаплення Дар'і Домрачавай з'явіліся на шматлікіх старонках у сацсетках.
Адным з першых стаў афіцыйны "Твітар" Міжнароднага саюза біятланістаў. Учынак беларускі тут назвалі справядлівым жэстам.
У Instagram самой біятланісткі яшчэ не з'явілася ніводнага фота з гонкі, як пад папярэднім пастом балельшчыкі ўжо дзякавалі спартсменцы за эмоцыі.
