Сёння ў Палацы Незалежнасці абмяркоўвалі будучыню беларуска-азербайджанскіх адносін. Прэзідэнт Аляксандр Лукашэнка сустрэўся з Міністрам абароны Азербайджана генерал-палкоўнікам Закірам Гасанавым. Гутарка пра двухбаковае супрацоўніцтва выйшла далёка за рамкі ваенна-тэхнічнай сферы. Пазіцыі краін шмат у чым супадаюць. Азербайджан - важны гандлёвы партнёр Беларусі ў Закаўказзі. За 10 гадоў агульны тавараабарот вырас з 30 мільёнаў долараў да 300. Тэмп супрацоўніцтва прэзідэнты падтрымліваюць асабістымі сустрэчамі. Пачынаючы з 2006 года, трымаюць рытм - раз на тры гады абменьваюцца візітамі. І заўсёды лідары краін сустракаюцца як сябры.
Аснову беларускага экспарту летась склалі трактары, нафтапрадукты, лесаматэрыялы, лекі, малочная прадукцыя. У эканоміку Беларусі прыцягнута інвестыцый амаль на 7,5 мільёна долараў. У Азербайджане працуюць 4 беларускія магазіны, а таксама больш за 70 прадстаўніцтваў, даччыных кампаній і дыстрыб’ютараў беларускіх прадпрыемстваў. Створаныя зборачныя вытворчасці трактароў МТЗ, аўтамабіляў МАЗ і МЗКЦ на базе Гянджынскага аўтамабільнага завода.
Закір Гасанаў, Міністр абароны Азербайджана: "Хачу перадаць Вам найлепшыя пажаданні і словы прывітання ад Прэзідэнта Азербайджана. Ён асабліва адзначыў нашы адносіны паміж вамі, паміж народамі. У Азербайджане любяць Беларусь і любяць Вас, з павагай ставяцца да Вашай краіны. У нас вельмі цесныя сувязі ва ўсіх галінах. Вы абсалютна правы, што ў нас ёсць чаму вучыцца адно ў аднаго. У ваенна-тэхнічнай галіне ёсць добрыя праекты. Усё гэта не супярэчыць міжнародным законам. З поўнай адказнасцю заяўляю, што абсталяванне, якое мы атрымлівалі па лініі ваенна-тэхнічнага супрацоўніцтва, высокай якасці, яно паспяхова ўжываецца ва Узброеных Сілах Азербайджана. І гэта нам дае магчымасць далей працягваць і нават пашыраць супрацоўніцтва, мы на гэта настроеныя".
У Беларусі Закір Гасанаў з трохдзённым візітам. Уражаннямі ад сустрэчы з Кіраўніком беларускай дзяржавы ён падзяліўся з журналістамі. А таксама даў высокую ацэнку якасці ўзбраення і тэхнікі беларускай вытворчасці.
Закір Гасанаў, Міністр абароны Азербайджана: "Мяне прымаў Прэзідэнт Беларусі, і я з вялікім уражаннем іду з сустрэчы. Гэта вялікі чалавек, я яшчэ раз упэўніўся. Сёння наша сустрэча прайшла на высокім узроўні. Усе, што мы хацелі абгаварыць, усе пытанні, што стаялі, атрымалі дадатную ацэнку, і нам далі зялёнае святло. Мы будзем у ваеннай сферы супрацоўнічаць яшчэ больш. Ваенна-тэхнічнае супрацоўніцтва мы ацэньваем вельмі высока. Гэта найлепшая беларуская якасць. Узброеныя Сілы Азербайджана карыстаюцца ўзбраеннем і тэхнікай беларускай вытворчасці, і я з поўнай адказнасцю заяўляю, што гэта высакаякаснае ўзбраенне і абсталяванне ваеннага прызначэння".
Кіраўнік Мінабароны Азербайджана таксама наведаў прадпрыемствы ваенна-прамысловага комплексу Беларусі. Падчас сустрэч абмяркоўваліся перспектывы развіцця і пашырэння двухбаковага супрацоўніцтва ў ваенна-тэхнічнай сферы і ў галіне вайсковай адукацыі. А таксама пытанні бяспекі і іншыя тэмы, якія выклікаюць узаемную цікавасць. Акрамя таго, мінабароны Беларусі і Азербайджана падпішуць план двухбаковага супрацоўніцтва на 2018 год.
